މިސްރުގެ ރައީސް އަބްދެލްފައްތާހު އައްސީސީ ވަނީ މިސްރުގައި އިސްކަންދަރިއްޔާ ކައިރީގައި އަލަށް ހަދާފައިވާ އަލަމައިން އަލްޖަދީދް ސިޓީގައި ސިފައިންނާއެކު ބައިސިކަލް ބުރެއް ޖައްސަވާފައެވެ.
މި ބައިސިކަލް ބުރުގައި ސީސީ ޒުވާނުންނަށް ދެއްވި ނަސޭހަތަކީ "ރަނގަޅަށް އަމިއްލަ ހަށިގަނޑު ގާނާލާށެވެ!"
އަލްއަލަމައިން އަލްޖަދީދް ސިޓީއަކީ ސީސީގެ ވެރިކަމުގައި ނިންމާފައިވާ އައު ސިޓީއެެކެވެ. ސީސީ ވަނީ މިސްރުގައި އައު ވެރިރަށެއްވެސް ބިނާ ކޮށްފައެެވެ. ސަރުކާރުގެ އޮފީސްތައް ދަނީ އައު ވެރިރަށަށް ބަދަލު ކުރަމުންނެވެ.
އިޔަށް ދުވަހު ސީސީ ވަނީ މިސްރުގެ ކޮރޯނާ ކުއްލިހާލަތު ތިން މަހަށް އިތުރު ކުރައްވާފައެވެ.
ސީސީގެ ވެރިކަން މަޝްހޫރުވެފައި ވަނީ ކުރީގެ ވެރިންނަށް ވުރެން ގިނައިން ސިޔާސީ މީހުން ޖަލަށް ލުމާއި، އުމުރުން ދުވަސްވީ މީޙުން ދަންޖެއްސުމާއި ކުރިން ކަންކުރަމުން އައި ގޮތާ ޚިލާފަށް ރަސްމީ ބަންދު ދުވަސްތަކާއި އީދުތަކުގައިވެސް މީހުން ދަންޖެއްސުމުގެ ކަންކަން ކުރިއަށް ގެންދާ ވެރިކަމެއްގެ ގޮތުގައެވެ.
