ކަޝްމީރުގައި ޒުވާނުންގެ ސިކުނޑި ދޮވެ، ހައްދުފަހަނައަޅައި ދިއުމަށް މަސައްކަތް ކުރާ ފަރާތްތަކުން އަދިވެސް އެމަސައްކަތް ކުރަމުން އެބަ ގެންދެއެވެ. އެހެންނަމަވެސް ޒުވާނުންނަށް ތަޢްލީމާއި ވަޒީފާއާއި ދުއްކާންދާރީގެ ފުރުސަތުތައް ފަހިވެގެން ދިއުމުގެ ސަބަބުން ޓެރަރިޒަމަށް އެނބުރޭ ޒުވާނުންގެ އަދަދު މަދުކަމަށް ދައްކައެވެ.
ކަޝްމީރު ފުލުހުންގެ ތަފާސްހިސާބުން ދައްކާ ގޮތުން މިއަހަރު ޓެރަރިސްޓް ޖަމާއަތްތަކާ ގުޅިފައި ވަނީ 69 ޒުވާނުންނެވެ. އޭގެ ކުރީ އަހަރު، 85 ޒުވާނުން ޓެރަރިސްޓް ޖަމާއަތްތަކާ ގުޅުނެވެ.
ފުލުހުން ބުނާ ގޮތުގައި އަދިވެސް ހައްދުފަހަނައަޅައިދާ ޒުވާނުން އެބަތިއްބެވެ. ނަމަވެސް މިދިޔަ އަހަރަށް ވުރެން ތަފާސްހިސާބު މަދުން ދެއްކުން އެއީ ކާމިޔާބީއެއް ކަމަށެވެ.
މިދިޔަ އަހަރު ކަޝްމީރުގައި ޓެރަރިސްޓުންނާއި 17 ހާދިސާއެއްގައި ފުލުހުން ކުރިމަތިލާން ޖެހުނެވެ. ނަމަވެސް މިއަހަރު މިހާތަނަށް އަދި ކުރިމަތިލާން ޖެހުނީ ތިން ހަތަރު ހާދިސާއެއްގައި ކަމަށް ފުލުހުން ބުނެއެވެ.
