ޗައިނާއާއި މިޔަންމާރގެ ސަރަހައްދު ބަންދުކޮށް ހިސާބުގަނޑުގެ މީހުން ކޮވިޑަށް ޓެސްޓް ކުރުމަށް ޗައިނާ ސަރުކާރުން ނިންމައިފިއެވެ. މިޔަންމާރއާއި އިންވެގެން އޮންނަ ޗައިނާގެ ޕްރޮވިންސަކީ، ޔުންނާން އެވެ. މި ޕރޮވިންސްގައި ބާރަށް ކޮވިޑް19 ފެތުރެމުން ދަނީއެވެ.
ޔުންނާންގެ ސަރުކާރުން އިޢްލާން ކޮށްފައިވާ ގޮތުގައި ޖިއާންޗެންގ ގެ ސްކޫލުތަކާއި ވިޔަފާރިތަކާއި ބާޒާރުތައް ބަންދުކުރުމަށެވެ. އަދި މި ސިޓީގެ އެންމެން ކޮވިޑަށް ފައްސިވެފައިވޭތޯ ބެލުމަށް ޓެސްޓް ކުރުމަށް ނިންމީއެވެ. މިއީ ވިއެޓްނާމާއި ލާއޯސްއާ ކައިރީގައި އޮންނަ ސިޓީއެކެވެ.
ސަރަހައްދީ ސަރުކާރުން ބުނެފައިވާ ގޮތުގައި ކޮވިޑް19އަށް ފައްސިވެގެން ރިޕޯޓްކޮށްފައިވާ އެންމެނަކީވެސް މިޔަންމާރގައި އުޅެފައި އައި މީހުންނެވެ. ޔުއްނާންގައި 297 މީހަކު ފައްސިވެފައިވާ ކަމަށް ރިޕޯޓްކޮށްފައި ވެއެވެ.
ފެބްރުއަރީގައި މިޔަންމާރ ސިފައިން ވަނީ އެގައުމުގެ ސަރުކާރު ވައްޓާލާފައެވެ.
