ޕާކިސްތާންގެ ކުރީގެ އެމްބެސެޑަރެއްގެ އަންހެން ދަރިފުޅު، އިސްލާމްއާބާދުގައި މަރާލި މައްސަލަ ބޮޑު ވެއްޖެއެވެ. މި ޖަރީމާ ހިންގާފައި ވަނީ އިސްލާމްއާބާދުގެ މަތީ ފަންތީގެ މީހުން ދިރިއުޅޭ ހިސާބެއްގައެވެ.
ނޫރު މުގައްދަމް 27އ. މަރާލި މީހާއަކީ ފުލުހުން ބުނާ ގޮތުގައި ނޫރުގެ ރައްޓެއްސެކެވެ. އަދި މި ފިރިހެން ސޮރަކީ މަސްތުވާތަކެތި ބޭނުން ކުރުމުގެ ރިކޯޑް އޮންނަ ޒުވާނެކެވެ.
ނޫރު މުގައްދަމްގެ ބައްޕަ ޝައުކަތު މުގައްދަމް އަކީ ދެކުނު ކޮރެއާއާއި ކަޒަޚިސްތާންގައި ޕާކިސްތާންގެ އެމްބެސެޑަރުގެ މަގާމު ފުރުއްވި ބޭފުޅެކެވެ.
ނޫރު މަރާލި މީހާއަކީ ނުފޫޒުގަދަ ކޮންސްޓްރަކްޝަންގެ ވިޔަފާރީގައި އުޅޭ އާއިލާއެއްގެ މީހެކެވެ. މީޑިއާގައި އުޅޭފަރާތްތަކާވެސް އޭނާ ރައްޓެއްސެވެ. އޭނާ ހައްޔަރުކޮށްފައި ވަނީ ނޫރުގެ ގެއާ ކައިރި ހިސާބަކުންނެވެ.
މުއްތަހަމް، ޒާހިރު ޖައުފަރު ހައްޔަރު ކުރުމާއެކު އޭނާއަކީ ބޯ ހަމަނުޖެހޭ މީހެއްކަމަށް މީޑިއާގައި ރިޕޯޓް ކުރުމުން ފުލުހުން ބުނެފައި ވަނީ ހައްޔަރު ކުރިއިރު އެސޮރު ހުރީ ބޯ ހަމަޖެހޭ ހާލަތެއްގައި ކަމަށެވެ.
ޝައުކަތު މުގައްދަމްވެސް ވިދާޅުވެފައި ވަނީ މި މުއްތަހަމަކީ މޮޔައެއްކަމަށް ހަދައިގެން އޭނާ ގައުމުން ބޭރަށް ފޮނުވަފާނެ ކަމުގެ ބިރު އެބައޮތް ކަމަށާއި އެކަން ހުއްޓުވަން ޖެހޭނެ ކަމަށެވެ. ޒާހިރުގެ އާއިލާއަކީ ގައުމުން ބޭރުގައި ގިނަ އިމާރާތްތަކެއް ގެންގުޅޭ ބައެކެވެ.
މިއީ އަންހެނަކާ ދެކޮޅަށް ހިންގާފައިވާ ޖަރީމާއެއްކަމަށް ބުނެ، މި ޖަރީމާގެ ވާހަކަ ޕާކިސްތާން މީސްމީޑިއާގައި ދެކެވެމުން ބޮޑު ވަޒީރު އިމްރާން ޚާންވެސް މިމައްސަލަ ބަލަން އިސްކަން ދޭންވާނެ ކަމަށް ވިދާޅުވިއެވެ. އަދި އިންސާނީ ހައްގުތަކާ ބެހޭ ވަޒީރާ ޝީރީން މަޒާރީވެސް މިކަމަށް ވާހަކަ ދެއްކެވިއެވެ. އެއަށްފަހު މުއްތަހަމް، ގައުމުން ބޭރުވެގެން ނުދެވޭ ގޮތަށް ސަރުކާރުން ވަނީ އޭނާ ބްލެކް ލިސްޓް ކޮށްފައެވެ.
އިސްލާމްއާބާދުގައި މި ޖަރީމާ ހިންގާފައިވާ އިރު އިހައްދުވަހަކު، އަފްޣާނިސްތާނުން ޕާކިސްތާނަށް ކަނޑައަޅާފައިވާ ސަފީރުގެ އަންހެން ދަރިފުޅު މަގުމަތިން ހުއްޓުވައިގެން ބަޔަކު ވަނީ އޭނާ ކިޑްނެޕްކޮށް އޭނާއާ ބެހިފައެވެ.
ޅަ ފިރިހެން ކުދިން ޖިންސީ ޝިކާރައަކަށް ނުވާގޮތަށް އެމީހުން ޙިމާޔަތް ކުރުމަށް ގިނަ މަސައްކަތްތަކެއް ކުރެވޭ ޕާކިސްތާންގައި އަންހެނުންގެ ޙައްގަށް އިޙުތިރާމު ނުކުރާ މައްސަލާގައި މީހުން ހަމަމަގަށް އެޅުވުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.
