ތިން މަހެއްހާ ދުވަސް ފަހުން ގދ. ތިނަދޫ އާންމު ހާލަތަށް ގެނެސްފިއެވެ.
ތިން މީހަކު ކޮވިޑް-19 އަށް ޕޮޒިޓިވްވެ ތިނަދޫ މޮނީޓަރިން ހާލަތަށް ގެނެސްފައިވަނީ މިދިޔަ އޭޕްރީލް މަހުގެ 24 ވަނަ ދުވަހުއެވެ.
އެޗްޕީއޭ އިން މިއަދު ނެރުނު އެންގުމުގައި ބުނީ މޮނީޓަރިން ހާލަތު ދަމަހައްޓަންޖެހޭ ސަބަބެއް މިހާރު ނެތް ކަމަށެވެ. އަދި މޮނީޓަރިން ހާލަތާއި ގުޅިގެން އަޅާފައިވާ ފިޔަވަޅުތައް ވެސް ނިމުމަކަށް އައިސްފައިވާ ކަމަށް އެޗްޕީއޭ އިން ބުނެއެވެ.
ތިނަދޫގެ މޮނީޓަރިންގެ ހާލަތު އުވާލަން ނިންމިއިރު، ތިނަދޫގައި ކޮވިޑްގެ 79 އެކްޓިވް ކޭސް އުޅޭ ކަމަށް ޑރ.އަބްދުއްސަމަދު މެމޯރިއަލް ހޮސްޕިޓަލް އިން ބުނެއެވެ. އަދި ހަތަރު މީހަކަށް ކޮވިޑް ފެސިލިޓީގައި ފަރުވާ ދެމުންދާއިރު، 846 މީހަކު ވަނީ ބަލިން ރަނގަޅުވެފައެވެ. މި ބަލީގައި ތިނަދޫ އިން ވަނީ ދެ މީހަކު ނިޔާވެފައެވެ.
