އިންޑިއާގެ ކަޝްމީރުގެ ސިޔާސީ ޙަޔާތަށް ދިރުމެއް އަންނާނެ ކަމުގެ އުންމީދެއް ލިބިގެން ދިޔައީ، ޖޫން 24 ގައި ކަޝްމީރުގެ ސިޔާސީ ޕާޓީތަކުގެ އިސްވެރިންނާއެކު އިންޑިއާގެ ބޮޑު ވަޒީރު ބޭއްވެވި ބައްދަލުވުމަށް ފަހުއެވެ. މިއީ އިންޑިއާއިން ގާނޫނުއަސާސީގެ މާއްދާ 370 އުވާލިތާ ދެ އަހަރު ފަހުން ކަޝްމީރުގެ ސިޔާސީ ޙަޔާތަށް ލިބުނު ދިރުމެކެވެ.
މިބައްދަލުވުމުގައި ބައިވެރިވެ ވަޑައިގަތް އެއް ބޭފުޅަކީ، ކުރީގެ ޗީފް މިނިސްޓަރ އުމަރު ޢަބްދުﷲއެވެ. އޭނާ ވިދާޅުވީ، އަލުން މާއްދާ 370 އަނބުރައި ގެނައުމަށް ވާހަކަ ދެއްކުމަކީ މޮޔަކަމެއް ކަމަށެވެ. އެކަމަކު އޭނާގެ ވާދަވެރިޔާ ކުރީގެ ޗީފް މިނިސްޓަރ މަޙްބޫބާ މުފްތީ ވިދާޅުވީ ކަޝްމީރުގައި ބާއްވާ ސަރަހައްދީ މަޖިލިސް އިންތިޚާބުގައި އެކަމަނާ ބައިވެރިވެ ވަޑައި ނުގަންނަވާނެ ކަމަށެވެ. އަދި އެކަމަނާ ބައިވެރިވެ ވަޑައިގަތުމަށް ކުރެއްވި ޝަރުތަކީ، މާއްދާ 370 އަށް އަލުން އަމަލު ކުރުން ފެށުމެވެ. އެކަމަނާ ވިދާޅުވީ މި މާއްދާއަކީ ކަޝްމީރު މީހުންނަށް އެމީހުންގެ ކަޝްމީރީ ޝަޚުޝިއްޔަތު ކަނޑައަޅައިދޭ މާއްދާ ކަމަށެވެ.
ކަޝްމީރުގެ ސިޔާސީ ލީޑަރުން ވިދާޅުވާ ގޮތުގައި މާއްދާ 370 އުވާލުމުން އެމީހުންގެ އަތުން ހުރިހައި ބާރެއް ނިއުދިއްލީގެ މަރުކަޒީ ސަރުކާރުން ވަނީ ނިގުޅައިގެންފައެވެ. މި މާއްދާ އުވާލުމަށްފަހު އިންޑިއާގެ މަރުކަޒީ ސަރުކާރާ ދެކޮޅަށް ޚިޔާލު ފާޅުކުރި ލީޑަރުން ގޭގައި ބަންދު ކުރެވުނެވެ. އަދި ކަޝްމީރުގައި ތްރީ ޖީ ނެޓްވަރކްގެ ފެންވަރު ދަށް ކުރެވުނެވެ.
މިހާރު މަންޒަރު ތަފާތެވެ. މި ފާއިތުވި ދެ އަހަރުގެ ތެރޭގައި ކަޝްމީރު ވަނީ ހަމަޖެހުމަކަށް އައިސްފައެވެ. އިންޑިއާ ސަރުކާރުން ވަނީ ގިނަ ކަންތައްތަކެއް ކަޝްމީރަށް ކޮށްދޭން ފަށާފައެވެ. އެކިއެކި ނަންނަމުގައި ފަންޑުތައް ކަނޑައަޅައި މީހުންނަށް ވިޔަފާރިތައް ފެށޭ ގޮތަށާއި މީހުން ތަމްރީނު ކުރުމަށާއި އައު ވިޔަފާރި ޚިޔާލާތުތަކަށް އަންހެނުންނާއި ޒުވާނުން ހޭނުމަށް ގިނަ ހޭދަތައް ކުރަމުން ދެއެވެ. މިކަންތައްތައް ކޮށްފައި ވަނީ ޕްރައިމިނިސްޓަރ ޑިވެލޮޕްމެންޓް ޕެކޭޖްގެ ދަށުންނެވެ.
މީގެ އިތުރުން އެންމެ ބޮޑަށް ފާހަގަ ކުރެވޭ ކަންތައްތަކުގެ ތެރޭގައި އިންފޮމޭޝަން ޓެކްނޮލޮޖީގެ އުފެއްދުންތަކަށް ހިތްވަރު ދިނުމުގެ ގޮތުން އައިޓީ ޕާކްތައް ހެދުމާއި އަދި ބޭރުން އައިސް އިންވެސްޓް ކުރާ ފަރާތްތަކަށް ކުލިތައް ސަބްސިޑައިޒް ކޮށްދިނުން ހިމެނެއެވެ. މި ދެ އައިޓީ ޕާކަކީ ކަޝްމީރުގެ މައި ދެސިޓީގައި ހެދި ދެޕާކެވެ. އެއް ޕާކް ހަދާފައި ވަނީ ޖަންމޫގައެވެ. އަނެއް ޕާކް ސްރީނަގަރުގައެވެ. މިއިން ކޮންމެ ޕާކެއްގައި ބައި މިލިއަން އަކަ ފޫޓު ހުރެއެވެ.
ކަޝްމީރުގައި ސަރުކާރު ބިންތައް އިންޑިއާގެ އެހެން ތަންތަނުން އަންނަ މީހުންނަށް ވިއްކަން ނުވަތަ ކުއްޔަށް ދިނުމަށް ވެސް ލޭންޑް ބޭންކްގެ ނަމުން ހަދާފައިވާ ސްކީމުން ދެ ފުށް ފެންނަ ގޮތަށް ބިން ހޯދުމަށް ބިޑް ކުރެވެއެވެ. ސަރުކާރުން ވަނީ މަގުތަކާއި ހައިވޭ ހެދުމުގެ މަޝްރޫއެއްވެސް ފަށާފައެވެ.
މީގެ އިތުރުން ރައްޔިތުންގެ އިތުބާރު ހޯދުމަށްޓަކައި ކަޝްމީރުގައި ސަރުކާރުން ކުރިން ފަށާފައިވާ ޕްރޮޖެކްޓްތައްވެސް އަވަހަށް ނިންމުމަށް މަރުކަޒީ ސަރުކާރުން ބާރުއެޅިއެވެ. 2015ގައި އިންޑިއާ ސަރުކާރުން ކަޝްމީރުގެ ތަރައްގީއަށް 800 ބިލިއަން ރުޕީސް ކަނޑައެޅިއެވެ. ހަތަރު އަހަރު ނިމިގެން ދިޔައިރު މި ފައިސާއިން ބޭނުން ކުރެވުނީ 37 ޕަސެންޓެވެ. މިއިން ބައެއް މަޝްރޫއުތައްވެސް ނިމިގެން ދިޔައީ 2020 ގައެވެ.
މީގެ 70 އަހަރު ކުރިއާއި އަޅާ ބަލާއިރު މިއަދު، މާއްދާ 370 އުވާލުމާ ދެމެދުގެ ތަފާތަކީ، އިންޑިއާގެ މަރުކަޒީ ސަރުކާރުން ރައްޔިތުންނަށް އެހެން ސްޓޭޓްތަކުގައި ހިންގާ ތަރައްގީގެ ޚާއްސަ ޕްރޮޖެކްޓްތަކާއި ބައެއް ކަންކަމުން އިސްތިސްނާވާން ލިބޭ ފުރުސަތު ކަޝްމީރަށްވެސް ލިބިގެން ދިއުމެވެ. މިސާލަކަށް އިންޑިއާގެ ސްޓޭޓްތަކުގައި އާބާދީގެ ފަގީރު ނުވަތަ ދަށުފަންތީގެ މީހުންނަށް ޚާއްސަ ސްކީމްތައް ހިންގެއެވެ. އަދި އަންހެނުން ބާރުވެރި ކުރުމަށްވެސް ޚާއްސަ ސްކީމްތައް ހިންގެއެވެ. ކަޝްމީރު ކުރިން އޮތް ގޮތުން ގާނޫނީ ގޮތުން ކަޝްމީރު މި ސްކީމްތަކުން އިސްތިސްނާ ވެގެން ދެއެވެ.
މާއްދާ 370 އުވާލިތާ މިވެގެން ދިޔައ ދެ އަހަރު ދުވަހުގެ ތެރޭގައި ކަޝްމީރަށް 150 ބިލިއަން ރުޕީސްގެ އިންވެސްޓްމެންޓް އެހެން ސްޓޭޓްތަކުން ލިބިފައި ވެއެވެ. މީގައި އިންފޮމޭޝަން ޓެކްނޮލޮޖޖީގެ ދާއިރާއާއި ޑިފެންސްގެ ދާއިރާއާއި އިއާދަކުރަނިވި ހަކަތައިގެ ދާއިރާއާއި ފަތުރުވެރިކަމާއި ހުނަރު އުފެއްދުމާއި ތަޢުލީމާއި ހޮސްޕިޓަލިޓީއާއި އުމްރާނީތަރައްގީގެ މަޝްރޫއު ހިންގާ 40 ކުންފުންޏަކުން ކޮށްފައިވާ އިންވެސްޓްމެންޓްތައް ހިމެނެއެވެ.
ޒުވާނުން ތަރައްގީކުރުމާއި ތަޢުލީމީ ދާއިރާގައި ކޮށްފައިވާ މަސައްކަތގައި، 2019އިން ފެށިގެން އެތައް ސަތޭކަ އައު ސްކޫލެއް ކަޝްމީރުގައި އިމާރާތް ކުރުމުގެ މަސައްކަތް ފާހަގަ ކުރެވެއެވެ. އަދި މަތީ ތަޢްލީމު ދޭ 50 އައު މުއައްސަސާއެއް ބިނާ ކުރުންވެސް ފާހަގަ ވެއެވެ. މީގެ އިތުރުން ކަޝްމީރު ދަރިވަރުންނަށް މަތީ ތަޢްލީމު ޙާސިލުކުރުމަށް އިތުރު 25 ހާސް ފުރުސަތު އެ ސްޓޭޓްގައި ފަހިވެގެން ދިޔައެވެ. އަދި ބައި މިލިއަން ޒުވާނުންނަށް ޚާއްސަ ސްކޯލަރޝިޕް ސްކީމްތައް ފެށިއެވެ.
ޕްރައިމިނިސްޓަރ ޑިވެލޮޕްމެންޓް ޕެކޭޖްގެ ދަށުން ކަޝްމީރުގައި އައު އިންޑިއަން އިންސްޓިއުޓް އޮފް ޓެކްނޮލޮޖީއެއް އަދި އިންޑިއަން އިންސްޓިއުޓް އޮފް މެނޭޖްމަންޓެއް ގާއިމް ކުރެވުނެވެ. މިއީ އިންޑިއާގައި އެންމެ މަތީ ފެންވަރުގައި މަތީ ތަޢްލީމު ދޭ ޑިމާންޑް ބޮޑު މަރުކަޒުތަކެވެ.
މީގެ އިތުރުން ސިއްޙީ ދާއިރާގައި ފާހަގަ ކުރެވެނީ، އޯލް އިންޑިއާ އިންސްޓިއުޓް އޮފް މެޑިކަލް ސައިންސަސްގެ ދެ ހަސްފަތާލް ގާއިމު ކުރުމާއި އިތުރު ހަތް މެޑިކަލް ކޮލެޖެއް އުފެއްދުމާއި ނަރސިންގ ކިޔަވައިދޭ ފަސް ކޮލެޖެއް އުފެއްދުމުގެ މަސައްކަތެވެ. އަދި ކަޝްމީރަށް ޚާއްސަ ކެންސަރ ހޮސްޕިޓަލެއްގެ މަސައްކަތް ދަނީ ކުރެވެމުނެވެ.
އުމުރާނީ ތަރައްގީގައި ފާހަގަ ކޮށްލެވޭ އަނެއްކަމަކީ، ކަޝްމީރުގެ ސައްތައިން ސައްތަ ގެތަކަށް ފުރަތަމަ ފަހަރަށް 24 ގަޑިއިރަށް ކަރަންޓު ގުޅައި ދެވުނުކަމެވެ. އަދި ރަށްފުށުގެ 43 އިންސައްތަ ގެތަކަށް ސާބު ބޯފެން ގުޅައި ދެވިފައި ވެއެވެ. ކަޝްމީރަށް ބޯފެން ގުޅައި ދެވިފައިވާ ނިސްބަތަކީ މުޅި އިންޑިއާގެ ނިސްބަތުންވެސް ވަރަށް ބޮޑު އަދަދެކެވެ. އިންޑިއާގައި ބޯފެން ގުޅައި ދެވިފައިވާ ނިސްބަތަކީ 21 އިންސައްތައެވެ. ސަރުކާރުން އެކުލަވާފައިވާ މަގުޗާޓާ އެއްގޮތަށް 2021ގެ ޑިސެމްބަރާ ހަމައަށް ކަޝްމީރުގެ ރަށްފުށުގެ 10816 މިލިއަން ގެތަކަށް ބޯފެން ގުޅައި ދެވޭނެއެވެ.
މާއްދާ 370އަށް ފަހު އައިސްފައިވާ ބަދަލުތަކުން ފެނިގެން ދަނީ ކަޝްމީރު ހިމޭންވެ، ފަތުރުވެރިކަމަށް އަލުން ހުޅުވިގެން ގޮސްފައިވާ ތަނެވެ. (ޓައިމްސް އޮފް އިންޑިއާ/ އިންޑިއަން އެކްސްޕްެރެސް)
