ޕާކިސްތާންގައި ކުރީގެ އެންބެސެޑަރގެ ދަރިފުޅު ނޫރު މުގައްދަމް މަރާލާފައިވާ ހާދިސާއިން ދައްކަނީ ޕާކިސްތާންގައި އަންހެނުންނާ ދެކޮޅަށް ކުރަމުންދާ އަނިޔާތައް ކަމަށް ދިރާސާ ކުރާ ފަރާތްތަކުން ބުނެއެވެ.
ނޫރު މުގައްދަމްގެ ގޭގައި އޭނާ މަރާލާފައި ވަނީ އޭނާ ދަންނަ މީހެކެވެ. މި މީހާ )ޒާހިރު ޖައުފަރު( އަކީ ޕާކިސްތާންގެ މުއްސަނދި އާއިލާއަކަށް ނިސްބަތްވާ މީހެކެވެ. ސިކުނޑި ހަމަނުޖެހޭ މީހުން ޕާކިސްތާންގައި އަންހެނުންނަށް އަނިޔާ ކުރުމާއި އަންހެނުން މަރާލުމުގެ ހާދިސާތައް އާންމު ކަމަށް ރިޕޯޓްތައް ބުނެއެވެ. އަދި މިފަދަ ޖަރީމާއެއް ހިންގުމަށްފަހު، އެމީހާގެ ބުއްދި ހަމަނުޖެހޭކަން ބަޔާން ކުރުމަށްފަހު އަދާލަތުން ސަލާމަތްވެ ދެއެވެ. ޖަރުފަރު ޒާހިރަކީ، މަސްތުވާތަކެތި ބޭނުން ކުރާ މީހެއްކަމަށް ވެއެވެ. އަދި އެތައް ފަހަރެއްގެ މަތިން އޭނާ ޔުނިވަސިޓީ ނިންމަން އުޅެގެން އެކަންވެސް އޭނާއަކަށް ނުވިއެވެ.
އދ. އިން ހަދާފައިވާ ދިރާސާއެއް ބުނާ ގޮތުން ޕާކިސްތާންގައި 50 އިންސައްތަ އަންހެނުން އަނިޔާވެރި އަމަލުތަކުގެ ޝިކާރައަކަށް ވެއެވެ. އަދި 90 އިންސައްތަ އަންހެނުންނަކީ، ނަފްސާނީ ގޮތުން ފިރިހެނުންގެ ފުށުން އުދަނގޫތައް ތަހައްމަލު ކުރާ މީހުންނެވެ. ދިރާސާ ކުރާ ފަރާތްތަކުން ބުނާ ގޮތުގައި އަންހެނުންނަށް އަނިޔާކުރާ މީހުން އަދުލު އިންސާފުގެ ކުރިމައްޗަށް ނުގެނެވޭނަމަ، އެފަދަ މީހުންގެ ފުށުން އަންހެނުންނަށް އަނިޔާކުރުން ތަކުރާރު ވެގެން ދެއެވެ.ޕާކިސްތާންގައި އަންހެނުންނަށް ގެއިން ބޭރަށް އެކަނި ނުދެވެނީ މިފަދަ ކަންތައްތަކުގެ ސަބަބުންނެވެ. އަދި މިހުރިހައި ކަމެއްގެ އަސްލު މައްސަލައަކީ ޕާކިސްތާންގައި ފިރިހެނުންނަކީ ބަސްހަރު އަދި އާއިލާގެ ކަންކަން ޚުދު މުޚުތާރުގޮތަށް ނިންމުގެ ޒިންމާ މަތިކޮށްފައިވާ ފަރާތްތައް ކަމުގައި ވާތީ ކަމަށްވެސް ދިރާސާ ކުރާ ފަރާތްތަކުން ބުނެއެވެ. އަންހެނުން ޙިމާޔަތް ކުރުމަށް ބިލެއް ލުމުން އެކަންވެސް އެދެވޭ ގޮތަކަށް ކާމިޔާބު ވެފައެއް ނުވެއެވެ.
