އެމެރިކާ ސިފައިން މެއި 1 ގައި އަފްޣާނިސްތާނުން ފައިބައިގެން ދާން ފެށުމާއެކު ތާލިބާނުން ދޭންފެށި ހަމަލަތަކުގައި އެމީހުން ވަނީ 150 ޑިސްޓްރިކްޓެއް އެމީހުންގެ ބާރުގެ ދަށަށް ގެންގޮސްފައެވެ. މިއީ އުތުރު އަފްޣާނިސްތާންގެ ތަންތަނެވެ. އުތުރު ސަރަހައްދަކީ ރައީސް އަޝްރަފް އަބްދުލްޣަނީގެ ޑިމޮކްރެޓިކް ސަރުކާރަށް ތާއީދު އޮންނަ ސަރަހައްދެކެވެ.
ތާލިބާނުން ސަރަހައްދުތައް ހިފައި ބާރުދައްކަން ފެށުމާއެކު އަފްޣާނިސްތާންގައި އިންސާނީ ހައްގުގެ ކަރާމާތް ގެއްލުން ވަނީ އާންމު ކަމަކަށް ވެފައެވެ. އަފްޣާނިސްތާން ސަރުކާރުގެ މަސްއޫލުވެރިންނާއި އެމެރިކާ ސިފައިންނަށް ވާގިވެރިވިކަމަށް ތުހުމަތު ކުރެވޭ މީހުންނާއި ޝައްކު ކުރެވޭ އަންހެނުންނާއި މެދު އަމަލު ކުރަމުން ދަނީ އިހާނެތި ގޮތަކަށެވެ.
އިހަށްދުވަހުވެސް އަފްޣާން ސަރުކާރުގެ ދެ މަސްއޫލުވެރިއަކު ދަން ޖައްސާފައި ވެއެވެ. މިމީހުން ދަން ޖެއްސުމުގެ ކުރިން އަނިޔާކުރިކަމަށްވެސް ވެއެވެ. އަދި ސިފައިންގެ ތެރޭން ތާލިބާނަށް އަމާން ދޭން އުޅުނު 22 މީހަކުވެސް ދަން ޖައްސާލިއެވެ. ތާލިބާނުގެ އަނިޔާވެރި ވީޑިއޯތައް ދަނީ މީސްމީޑިއާގައި ބާރަށް ފެތުރެމުންނެވެ.
ޖޫން 2021ގައި ތާލިބާނުން ބަޔާން ދީފައި ވަނީ އެމީހުން އަންހެނުންނާ ބައިމަދު ހަޒާރާއިންނާއި ޝީއީންގެ އިންސާނީ ހައްގަށް އަރައި ނުގަންނާނެ ކަމަށާއި ގަތުލުއާންމުތައް ނުހިންގާނެ ކަމަށާއި މުސްލިމުންނާއި އެހެން ދީންތަކުގެ މީހުންގެ އަޅުކަމުގެ މަރުކަޒުތަކަށް އިހާނެތިކޮށް ނުހިތާނެ ކަމަށެވެ.
ތާލިބާންގެ އަމަލުތަކުން ސާފުކޮށް ފެންނާން އޮތީ މިއީ ޕްރޮޕެގެންޑާގެ ވާހަކަތައް ކަމަށެވެ.
ތާލިބާނުން ބުނާ ގޮތުގައި އެމީހުންގެ އަތްދަށުގައި އަފްޣާނިސްތާންގެ 85 ޕަސެންޓް ސަރަހައްދު މިހާރު އެބައޮތެވެ. ނަމަވެސް މިވާހަކަ އެއްވެސް ފަރާތަކުން ޔަގީން ކޮށްދީފައެއް ނުވެއެވެ.
ތާލިބާނާއި އެމެރިކާގެ 20 އަހަރުވީ ކުރިމަތިލުމުގައި އަފްޣާނިސްތާންގެ 47600 މީހުންގެ ފުރާނަ ވަނީ ގެއްލިފައެވެ.
ހިއުމަން ރައިޓްސް ވޮޗްއާއި އިންސާނީ ހައްގަށް މަސައްކަތް ކުރާ އެހެން ފަރާތްތަކުން ބުނާ ގޮތުގައި ތާލިބާނުން އަދިވެސް ކަން ކުރަނީ އެމީހުން ވެރިކަމުގައި ތިބި އިރު ތިބި ގޮތަށެވެ. ބަދަލެއް އައިސްފައެއް ނުވެއެވެ. ތާލިބާނަކީ އަދިވެސް ހަމަ ޓެރަރިސްޓް ޖަމާއަތެކެވެ.
