ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ހއ. ތަކަންދޫ މޮނިޓަރިންގ އަށް ލައިފި އެވެ.
އެރަށް މޮނިޓަރިންގ އަށް ލާފައިވަނީ ފްލޫ ކްލިނިކަށް ދައްކަން އައި މީހަކު ކޮވިޑް-19 އަށް ޕޮޒިޓިވްވުމުން ނެވެ.
އެޗްޕީއޭ އިން ތަކަންދޫ ކައުންސިލަށް އަންގާފައިވަނީ އެ ރަށް މޮނިޓަރިންގ އަށް ލާފައިވަނީ ކޮވިޑް-19 އިން ރައްކާތެރިވުމަށް އިތުރަށް ބަލަން ޖެހޭ ކަންކަން ހުރުމާއި ކޮންޓެކްޓް ޓްރޭސިންގެ މަސައްކަތް ކުރިޔަށް ގެންދިޔުމަށް ކަމަށެވެ.
މީގެ އިތުރުން އެރަށް މޮނިޓަރިންގ އަށް ލީ ސަލާމަތީ ފިޔަވަޅެއްގެ ގޮތުން ކޮމިޔުނިޓީ ސްޕްރެޑެއް އޮތްތޯ ބަލާ ޔަގީން ކުރުމަށާއި އެއީ އައިސޮލޭޓެޑް ކޭހެއްތޯ ކަށަވަރު ކުރުމަށް ކަމަށް ވެސް ބުނެފައި ވެއެވެ.
އެގޮތުން ކޮންޓެކްޓް ޓްރޭސިންގ ގެ މަސައްކަތް މިހާރު ކުރިޔަށްދާ ކަމަށް އެޗްޕީއޭ އިން ބުނެއެވެ.
ތަކަންދޫއާއެކު ރާއްޖޭގައި 11 ރަށެއް މޮނިޓަރިންގ ގައި އެބައޮތެވެ.
