އަފްޣާނިސްތާން ސިފައިންނަށް ތާލިބާނާ ކުރިމަތި ލުމުގައި ހިތްވަރެއް ނެތް ކަމަށާއި އެމެރިކާ ސިފައިން އަފްޣާނިސްތާނުން ފައިބައިގެން ދިއުމުން ސަރުކާރަށް ތާލިބާނާ ދެކޮޅަށް ހިފަހައްޓާ ނުލެވޭނެ ކަމަށް އެމެރިކާގެ އިންސްޕެކްޓަރ ޖެނެރަލް ފޯރ ކޮންސްޓްރަކްޝަން އޮފް އަފްޣާނިސްތާން އިން އެންމެ ފަހުން ތައްޔާރު ކުރި ރިޕޯޓްގައި ބުނެފިއެވެ. މި ރިޕޯޓްގައި ބުނާ ގޮތުން މިހާރު ހާލަތު މިދާގޮތަށް ތާލިބާނުން ބާރުގަދަވަމުން ދަނީނަމަ، ކާބުލްގައި ސަރުކާރު ދެމިއޮތުމަށް ހަނގުރާމަ ކުރަން ޖެހޭނެއެވެ.
އެމެރިކާއިން ވަނީ ޓެރަރިސްޓް ޖަމާއަތެއްކަމަށް ލޭބަލް ކޮށްފައިވާ ތާލިބާނާއެކު ސުލްހައިގެ އެއްބަސްވުމެއްގައި ސޮއިކޮށް، އެޖަމާއަތަށް ގާނޫނީ ހައިސިއްޔަތެއް ދީފައެވެ.
ތާލިބާނުން ވެސް ދަނީ ބައިނަލްއަގްވާމީ މައިދާނުގައި ގައުމުތަކުގެ ރުހުން ލިބޭތޯ ބައްދަލުންތައް ބާއްވަމުންނެވެ. ޕާކިސްތާނުން ދަނީ ތާލިބާނުން ސުލްހަ ވެރި ބަސްމަގު ގެންގުޅުމަށް ބާރު އަޅަމުންނެވެ.
ތާލިބާނުން ބާރުގަދަ ވަމުން ދިއުމާއެކު އަފްޣާނިސްތާންގެ އަވަށްޓެރިންނާއި އަފްޣާނިސްތާންގައި މަސްލަހަތު ހިމާޔަތް ކުރަން ބޭނުންވާ ފަރާތްތަކުން ދަނީ ތާލިބާނާއެކު މަޝްވަރާތއް ބާއްވަމުންނެވެ. ރަޝިޔާއިން ވަނީ ތާލިބާނާއެކު މަޝްވަރާތައް ބާއްވާފައެވެ. އެއަށްފަހު އީރާނުން ވެސް ވަނީ ތާލިބާނާއެކު ސުލްހައިގެ ވާހަކަތައް ބާއްވާފައެވެ. އަދި އެންމެ ފަހުން ޓިންޖިއަންގައި ޗައިނާއިންވެސް ވަނީ ތާލިބާނާއެކު މަޝްވަރާތައް ބާއްވާފައެވެ.
ޗައިނާއިން މި ބައްދަލުވުމުގައި އިސްވެ ހުންނެވީ ޗައިނާގެ ޚާރިޖީ ވަޒީރު ވަންގ ޔީއެވެ. ތާލިބާނުގެ ފަރާތުން އިސްވެ ހުރީ އެޖަމާއަތުގެ ދެވަނަ މީހާ މުއްލާ އަބްދުލް ޣަނީ ބިރާދަރީއެވެ.
ޗައިނާއިން ބުނެފައި ވަނީ ތާލިބާނަކީ އަފްޣާނިސްތާންގެ ސިޔާސީ މައިދާނުގައި މުހިންމު ބައެއް ކަމަށެވެ. އަދި އަފްޣާން ސުލްޙައިގެ މަސައްކަތުގައި ތާލިބާނުން މުހިންމު ދައުރެއް އަދާ ކުރާނެ ކަމަށެވެ.
