ޗައިނާއާ ދެކޮޅަށް ހުނަރުތައް އިތުރުކުރުމަށް ގައުމުތަކުން ބާއްވާ އަސްކަރީ ތަމްރީންތަމކާއި ހަރަކާތްތައް އިތުރު ކޮށްފިއެވެ. އިންޑިއާއިން ބާއްވާ މަލާބާރު އަސްކަރީ ތަމްރީންތައް އެމެރިކާގެ ގުއާމްގައި މިމަހުގެ ފަހުކޮޅު ބާއްވާނެއެވެ.
އޮސްޓްރޭލިއާއިން އިންތިޒާމު ކުރި ކަނޑުގެ އަސްކަރީ ތަމްރީންތައްވެސް ވަނީ ނިންމާލާފައެވެ. ޓެލިސްމަން ސޭބާގެ ނަމުން ކޮންމެ ދެ އަހަރަކުން އެއްފަހަރަކު ބާއްވާ އަސްކަރީ ތަމްރީންތަކުގައި ،މިއަހަރު ބައިވެރިވާން އޮސްޓްރޭލިއާއިން ދައުވަތު ދީފައި އޮތީ އެމެރިކާ، ޖަޕާން އަދި ޔޫކޭ، ކެނެޑާއާއި ދެކުނު ކޮރެއާއަށެވެ. 2023ގައި އޮންނަ ޓެލިސްމަން ސޭބާ ތަމްރީންތަކުގައި އިންޑިއާއިންވެސް ބައިވެރިވާނެއެވެ.
އިންޑިއާއިން ވަނީ މަލާބާރު ޑްރިލްގައި 13 އަހަރު ފަހުން އޮސްޓްރޭލިއާ ބައިވެރިކޮށްފައެވެ.
މިއަހަރުގެ ޓެލިސްމަން ސޭބާގައި، 17 ހާސް ސިފައިންނާއި 18 މަނަވަރާއި 70 އަސްކަރީ މަތިންދާބޯޓާއި 150 ހެލިކޮޕްޓަރ، ހަތް ގައުމަކުން ބައިވެރިކުރިއެވެ.
އިންޑިއާއިން ބުނާ ގޮތުގައި ޚިޔާލު އެއްގޮތް ގައުމުތައް ގުޅިގެން ބާއްވާ އަސްކަރީ ތަމްރީންތަކަކީ، ދުރާލައިގެ ކުރިމަގުގައި ދިމާވެދާނެ ހިރާސަކާއި ކުރިމަތިލުމަށާއި ހިންދު ކަނޑާއި ޕެސިފިކް ކަނޑު ދަތުރުފަތުރަށް ހުޅުވާފައި ބޭއްވުމަށް ފިޔަވަޅު އެޅުމުގެ ގޮތުން ކުރަން ޖެހޭ މުހިންމު މަސައްކަތެއް ކަމަށެވެ.
އިންޑިއާއިން ބޭ އޮފް ބެންގޯލްގައި ބާއްވާފައިވާ އަސްކަރީ ތަމްރީންތަކުގައި ފްރާންސްވެސް ބައިވެރިކުރިއެވެ. އަދި އިންޑިއާއިން ވަނީ އިނގިރޭސި މަނަވަރުތަކާއެކުވެސް ތަމްރީން ބާއްވާފައެވެ.
އިނގިރޭސި ކުއީން އެލިޒަބަތު މަނަވަރު ގްރޫޕް މި ވަގުތު ހަރަކާތްތެރި ވަމުން ދަނީ ދެކުނު ޗައިނާ ކަނޑުގައެވެ. ޗައިނާއިން ބުނެފައިވަނީ ޗައިނާއިން އަމިއްލަ ސަރަހައްދުތައް ކަމަށް ދެކޭ ޖަޒީރާތަކާއި ފަޅުގިރިއާ އިނގިރޭސި މަނަވަރުތަކުން ކައިރިވާ ނަމަ ފައްސާލާނެ ކަމަށެވެ.
އިންޑިއާއިން އިޢުލާން ކޮށްފައި ވަނީ ދެކުނު ޗައިނާ ކަނޑާއި ދެކުނު އިރުމަތީ އޭޝިއާ ސަރަހައްދުގައި އެއް މަސް ދުވަހަށް ހަރަކާތްތެރިވުމަށް އިންޑިއާއިން މަތީ ފެންވަރުގެ ހަތަރު މަނަވަރެއް ފޮނުވުމަށް ތައްޔާރު ކުރަމުންދާ ކަމަށެވެ.
މިއީ މިސަރަހައްދަށް މިހާ ދިގު މުއްދަތަކަށް އިންޑިއާގެ ނޭވީ ފޮނުވާ ފުރަތަމަ ފަހަރެވެ.
