ޖުލައި މަސް ނިމިގެން ދިޔަ ހަފްތާއަކީ އެމެރިކާގެ ބައިޑެންގެ ސަރުކާރުން އޭޝިއާއަށް ސަމާލުކަންދީގެން މަސައްކަތްތަކެއް ކުރި ހަފްތާއެކެވެ. އެމެރިކާގެ ޚާރިޖީ ވަޒީރުގެ އިންޑިއާ ފުރަތަމަ ދަތުރުފުޅުވެސް އޮތީ ޖުލައި 27އާއި 28ގައެވެ. އޭނާގެ ނިއުދިއްލީގެ ދަތުރުފުޅު ނިންމަވާލެއްވި އިރު ޑެޕިއުޓީ ސެކްރެޓެރީ އޮފް ސްޓޭޓް ވެންޑީ ޝަރމަން އޭނާގެ ބެއިޖިންގގެ ދަތުރުފުޅު ނިންމަވާލެއްވިއެވެ. އަދި އެމެރިކާގެ ދިފާއީ ވަޒީރު ލުއޭޑް އޮސްޓިންގެ ދެކުނު އިރުމަތީ އޭޝިއާގެ ދަތުރުފުޅު ނިންމަވާލެއްވީވެސް ހަމަ އެހަފްތާގައެވެ.
ޖުލައި 27ގައި އެމެރިކާގެ ސްޓޭޓް ޑިޕާޓްމަންޓުން ބުނެފައި ވަނީ އިންޑިއާއަކީ އެމެރިކާގެ ބައިވެރިއެއްކަމަށާއި އަދި ކުރިއަރަމުން އަންނަ ބާރެއްގެ ގޮތުގައި ބަލައިގެން އެމެރިކާއިން އިންޑިއާއަށް އެހީތެރިވެދޭނެ ކަމަށެވެ.
އެމެރިކާއާއި އިންޑިއާއަކީ ޚިޔާލު އެއްގޮތް ދެ ޑިމޮކްރެސީއެވެ. އަދި އެމެރިކާއާއި އިންޑިއާއަށް މައިގަނޑު ގޮތެއްގައި ފަސް ގޮންޖެހުމެއްވެސް ކުރިމަތިވާކަމަށް ރިޕޯޓްތައް ބުނެއެވެ. އޭގެ ތެރޭގައި ކުއޯޑް ނުވަތަ އެމެރިކާއާއި އިންޑިއާއާއި ޖަޕާނާއި އޮސްޓްރޭލިއާ ބައިވެރިވާ ހަތަރު ގައުމުގެ ޖަމާއަތް ބައްޓަން ވަމުން ދަނީ ކޮންގޮތަކަށްކަން އަދި ސާފެއް ނުވެއެވެ.
އެމެރިކާގެ ޚާރިޖީ ވަޒީރު ނިއުދިއްލީގައި ނޫސްވެރިންނާ ވާހަކަދައްކަވަމުން ވިދާޅުވީ، ކުއޯޑަކީ އަސްކަރީ އިއްތިހާދެއް ނޫން ކަމަށެވެ. އެކަމަކު މިހަތަރު ގައުމުން ބައިވެރިވެގެން އަސްކަރީ ތަމުރީންތައް ބާއްވާފައި ވެއެވެ.
މިހަތަރު ގައުމުން ބައިވެރިވެގެން އިޢުލާން ކުރި، ދުނިޔެއަށްޓަކައި އިންޑިއާއިން ވެކްސިން އުފެއްދުމާއި އެމަސައްކަތުގައި އިންޑިއާއަށް އެމެރިކާއިން އެހީތެރިވުމާއި އަދި ވެކްސިން ދުނިޔެއަށް ބެހުމުގެ ލޮޖިސްޓިކް މަސައްކަތުގައި ޖަޕާނާއި އޮސްޓްރޭލިއާއިން އުޅޭނެކަމަށް އިޢުލާން ކުރިނަމަވެސް މިކަން އަދި ކުރިއަކަށް ނުދެއެވެ.
އިންޑިއާއަކީ ސަރަހައްދީ މައްސަލައެއްގައި ޗައިނާއާއެކު އަރައިރުމެއް އޮންނަ ގައުމެކެވެ. އެމެރިކާއަކީ ވިޔަފާރިއާއި އެމެރިކާގެ ފިކުރީ މުދާ ވަގަށް ނެގުމުގެ މައްސަލަތަކުގައި ޗައިނާއާއެކު އަރައިރުމެއް އޮންނަ ގައުމެކެވެ. ޗައިނާއާ ކުރިމަތިލުމުގައި އެމެރިކާއާއި އިންޑިއާއިން ބަހާއި އަމަލު އެއްގޮތް ކުރާނީ ކޮން ގޮތަކަށް ކަން ސާފެއް ނުވެއެވެ. އިންޑިއާއިން ޗައިނާއާ ކުރިމަތިލުމަށް ބޭނުންވާ އެހީތެރިކަން އެމެރިކާއިން އަދި ފުރިހަމައަށް ދީފައެއް ނުވެއެވެ.
އަފްޣާނިސްތާނުން އެމެރިކާ ސިފައިން ފައިބައިގެން ދިއުމުން އިންޑިއާއަށް ވަނީ ގޮންޖެހުންތަކާ ކުރިމަތިލާން ޖެހިފައެވެ. ތާލިބާން ބާރުގަދަ ވުމުގެ ސަބަބުން އަފްޣާނިސްތާނަކީ އިންޑިއާއާ ދެކޮޅުވެރި ފަރާތްތަކަށް އަމާން ސަރަހައްދަކަށް ވެދާނެކަމުގެ ބިރު އިންޑިއާއިން އިހުސާސް ކުރެއެވެ. އެމެރިކާއާއި ތާލިބާނުން ހަދާފައިވާ އެއްބަސްވުމުގައި ބުނެފައި ވަނީ އަފްޣާން ސަރަހައްދު އެމެރިކާއާއި އެމެރިކާގެ ބައިވެރިންނާ ދެކޮޅަށް ބޭނުން ކުރުމަށް ތާލިބާނުން ދީގެން ނުވާނެ ކަމަށެވެ. މި މަފްހޫމުގައި އިންޑިއާއަކީ އެމެރިކާގެ ބައިވެރިއެއް ނޫނެވެ.
އިންޑިއާއާއި އެމެރިކާގެ ގުޅުމަށް ދިމާވާ ފަސްވަނަ ގޮން ޖެހުމަކީ، ޑިމޮކްރެޓިކް އުސޫލުތަކެވެ. ބްލިންކިންއާ ބައްދަލުކުރެއްވުމަށްފަހު އިންޑިއާގެ ބޮޑު ވަޒީރު ކުރެއްވި ޓުއީޓްގައި ވިދާޅުވީ، ދެގައުމުން ޑިމޮކްރެސީގެ އުސޫލުތައް ހިއްސާކުރާ ކަމަށެވެ. ނިއުދިއްލީއާއި ވޮޝިންޓަނުގައި މިވާހަކައަށް އިޢުތިރާޒް ކުރި ފަރާތްތަކުން ސުއާލުކޮށް އަހާފައި ވަނީ ނާ ހަމަ ތެދެއް ހެއްޔެވެ؟ އިންޑިއާއަކީ ނޫސްވެރިންނާ ހަތުރުވެރި މިނިވަންކަން ކުޑަވެފައިވާ ގައުމެއްގެ ގޮތުގައި ގިންތިކޮށްފައިވާ ގައުމެކެވެ.
ފްރީޑޮމްހައުސްއިން ކުރިން އިންޑިއާ ގިންތި ކޮށްފައި ވަނީ މިނިވަން ގައުމެއްގެ ގޮތުގައެވެ. މިހާރު ގިންތިކޮށްފައި ވަނީ ބައިކުޅަ ބައި މިނިވަން ގައުމެއްގެ ގޮތުގައެވެ.
