އަފްޣާނިސްތާންގައި ތާލިބާނާއި އަލްގައިދާ ކުރިންވެސް ގުޅިގެން ހަނގުރާމަ ކުރަމުން ދިޔަ ގޮތަށް މިހާރުވެސް ހަނގުރާމަ ކުރަމުންދާ ކަމަށާއި ބިދޭސި ހަނގުރާމަވެރިން ދަނީ ތާލިބާނުންނާއި އަލްގައިދާގެ ހަނގުރާމައިގައި ވާގިވެރިވަމުން ކަމަށް ރިޕޯޓް ކޮށްފިއެވެ. މި ވާހަކައަކީ، 2021ގެ ޖޫން މަހު އދގެ ސަލާމަތީ މަޖިލީހަށް، އެނަލީޓިކަލް ސަޕޯޓް އެންޑް ސެންކްޝަންސް މޮނީޓަރިންގ ޓީމުން ހުށަހެޅި ރިޕޯޓްގައި ފާހަގަ ކޮށްފައިވާ ކަމެކެވެ. އަލްގައިދާއާއި ތާލިބާނުންނަކީ ވަކިކޮށްލެވޭނެ ބައެއް ނޫން ކަމަށް ބުނެފައި ވެއެވެ. އަފްޣާނިސްތާންގެ 34 ޕްރޮވިންސެއްގެ ތެރޭން 15 ޕްރޮވިންސެއްގައި ތާލިބާނުން ހަރަކާތްތެރި ވެއެވެ. ބޭރުން ވަދެފައި ތިބި ހަނގުރާމަވެރިންގެ އަދަދު ދިހަ ހާހަށްވުރެން ގިނަ ކަމަށް ބުނެއެވެ. އޭގެ ތެރޭގައި ރަޝިޔާގެ އުތުރު ސަރަހައްދުން ވަދެފައިވާ ހަނގުރާމަވެރިންނާއި ޕާކިސްތާނާއި ޝިންޖިއާން ޕްރޮވިންސުން ވަދެފައި ތިބި މީހުންނާއި ސެންޓްރަލް އޭޝިއާގެ ގައުމުތަކުން ހަނގުރާމަވެރިން ވަދެފައި ތިބިކަމަށް ބުނެއެވެ. އަފްޣާން ސަރުކާރާ ދެކޮޅަށް ހަނގުރާމަ ކުރަމުންދާ ތާލިބާންގެ ތެރޭގައި މި ބިދޭސި ހަނގުރާމަވެރިންނާއި އަލްގައިދާގެ ހަނގުރާމަވެރިންވެސް ހިމެނެއެވެ.
އދގެ ސެކްރެޓަރީ ޖެނެރަލްގެ ފަރާތްފުޅުން އަފްޣާނިސްތާނަށް ކަނޑައެޅުއްވި މަންދޫބު ކްރިސް އެލެކްޒަންޑަރ ވިދާޅުވާ ގޮތުގައި ތާލިބާނާއި އަލްގާއިދާގެ ލީޑަރުން ދިރިއުޅެނީ އަފްޣާން ޕާކިސްތާން ސަރަހައްދުގައެވެ.އަދި މިމީހުންގެ އޮޕަރޭޝަންސްއާއި ލޮޖިސްޓިކްސްގެ މަސައްކަތް ބެލެހެއްޓުމަށް ޕާކިސްތާންގައި އޮފީސްތައް ހަދާފައި ހުރެއެވެ. އަދި މިއޮފީސްތަކުގެ މައްސައްތައް ގުޅިފައި ހުންނަނީ ޕާކިސްތާންގެ ޖާސޫސީ އިދާރާ އިންޓަރ ސަރވިސަސް އިންޓެލިޖެންސާއެވެ. އެލެގްޒެންޑަރ ވިދާޅުވާ ގޮތުގައި އެއްވެސް މީހަކު މިވާހަކައަށް އަލިއަޅުވާލާކަށް ބޭނުމެއް ނުވެއެވެ.
އެލެގްޒެންޑަރއަކީ، ޕާކިސްތާނުން ނުސީދާ ގޮތަކަށް ތާލިބާނާއި އަލްގައިދާ މެދުވެރިކޮށް އަފްޣާނިސްތާންގައި ހަނގުރާމަ ކުރަމުންދާކަން ޑޮކިއުމެންޓްކޮށް އެކަމަށް ފޮތެއް ލިޔުއްވި ބޭފުޅެކެވެ. އޭގެ ފޮތް އެންޑިންގ ޕާކިސްތާންޒް ޕްރޮކްސީ ވަރ އިން އަފްޣާނިސްތާން އަކީ މަގްބޫލު ފޮތެކެވެ.
