ތާލިބާނުން ވަނީ އޮގަސްޓް 3 ގައި އަފްޣާނިސްތާންގެ ވަގުތީ ޑިފެންސް މިނިސްޓަރ ޖެނެރަލް ބިސްމިﷲ މުޙައްމަދީ ގެ ގެއަށް ކާރު ބޮމުގެ ހަމަލައެއް ދީފައެވެ. މި ހަމަލާއަށް ތާލިބާނުން ވަނީ ޒިންމާ އުފުލާފައެވެ. މީގައި ތާލިބާންގެ ހަނގުރާމަވެރިންގެ ހަ މީހަކު ބައިވެރިވިއެވެ.
މިހަމަލައަށް ފަހު އެ ސަރަހައްދުގައި ދިރިއުޅޭ ޕާލަމެންޓްގެ މެމްބަރެއްގެ ގެއަށްވެސް ތާލިބާނުން ހަމަލަތައް އަމާޒު ކުރިއެވެ. ޖުމުލަ ވިއްސަކަށް މީހުން މި ހަމަލާގައި މަރުވިއެވެ. މީގެ ތެރޭގައި މުޙައްމަދީގެ ގޭގެ ފާރަވެރިންވެސް ހިމެނެއެވެ.
އޮގަސްޓް 4ގައި އަފްޣާން މިނިސްޓްރީ އޮފް ޑިފެންސްއިން ބުނެފައިވާ ގޮތުގައި ތާލިބާންގެ 274 މީހުން މަރާލެވިފައި ވެއެވެ. 119 ޓެރަރިސްޓުން ޒަޚަމްވިކަމަށްވެސް ރިޕޯޓް ކޮށްފައި ވެއެވެ.
ފާއިތުވި 24 ގަޑި އިރުގެ ތެރޭގައި ނަންގަހާރާއި ލޯގާރާއި ކަންދަހާރާއި ފަރަހަ އަދި ހީރާތާއި ޖައުޒާންއާއި ބަލަޚް އަދި ފަރްޔާބާއި ސަރާއެ ޕޮލް އަދި ހެލްމަންދާއި ކުންދޫޒާއި ބަޣްލާންއާއި ކަޕްސިއާއާއި ކާބުލްގައި ތާލިބާނާއި ސިފައިންނާ ދެމެދު ހަމަލަތައް ބަދަލުކޮށްފައި ވެއެވެ.
ތާލިބާނުން ވަނީ އަލަށް ހީރާތު ޕްރޮވިންސްގައި ހަދާފައިވާ ސަލްމާ ޑޭމްއަށް ހަމަލަ ދޭން މަސައްކަތް ކޮށްފައެވެ. ސިފައިން ވަނީ މިކަން ނާކާމިޔާބު ކޮށްފައެވެ.
ލަޝްކަރުގާހް ސިޓީގައި ތާލިބާނާއި ސިފައިންނާ ދެމެދު ވަރުގަދަ ހަމަލަތަކެއް ބަދަލު ކުރެވެމުން އެބަދެއެވެ. ތާލިބާނުން މަސައްކަތް ކުރަމުން ދަނީ ސިޓީގެ ފުލުހުންގެ ބޮޑު މަރުކަޒު އެމީހުންގެ ބާރުގެ ދަށަށް ގެނައުމަށެވެ. މި ސިޓީގައި އަފްޣާން ސިފައިންގެ ކޮމާންޑަރު ވަނީ ރައްޔިތުންނަށް އެމީހުންގެ ގެތައް ވަގުތީ ގޮތުން ދޫކޮށް ދިއުމަށް ގޮވާލާފައެވެ. މީގެ މަގްސަދަކީ ފިލައިގެން ތިބި ތާލިބާންގެ ހަނގުރާމަވެރިން ބޭރުކޮށްލުމެވެ.
އަފްޣާން ސިފައިން ބުނާ ގޮތުން ހެލްމަންދު ޕްރޮވިންސްގައި އަފްޣާން ވައިގެ ސިފައިން ދިން ހަމަލާގައި މަރުވި މީހުންގެ ތެރޭގައި ޕާކިސްތާން ރައްޔިތުންވެސް ހިމެނެއެވެ.
ތާލިބާނުން ވަނީ ހީރާތު އެއަރޕޯޓަށް ރޮކެޓް ހަމަލަތަކެއް ދީ ރަންވޭ ހަލާކުކޮށްލާފައެވެ. މީގެ ސަބަބުން ފްލައިޓްތައް ކެންސަލްކޮށް ކާބުލް އެއަރޕޯޓަށް ބޯޓްތައް ޖައްސާފައި ވެއެވެ.
ނަންގަހާރުގެ ގަވަރުނަރު ވިދާޅުވާ ގޮތުގައި ތާލިބާނުން ދީފައިވާ ފަސް ހަމަލައެއް ސިފައިން ވަނީ ނާކާމިޔާބު ކޮށްލާފައެވެ. ސިފައިން ދަނީ ޖަލާލްއާބާދުން ތޯރްޚާމްއަށް އޮންނަ ހައިވޭ ދިފާއުކޮށް ތާލިބާނުގެ އަތްދަށަށް ހައިވޭ ނުދާ ގޮތަށް ސަލާމަތީ ފިޔަވަޅު ވަރުގަދަ ކޮށްފައެވެ.
އަފްޣާން ސިފައިން ބުނާ ގޮތުން ބަމިޔާން ޕްރޮވިންސްގެ ތާލިބާނުން އައްޔަން ކުރި ގަވަރުނަރު ވަނީ މަރާލާފައެވެ. އޭނާ މަރާލުމަށް އަފްޣާން ސިފައިން ދިން ވައިގެ ހަމަލާގައި އޭނާއާއެކު 40 ޓެރަރިސްޓުންވެސް މަރުވިއެވެ.
ތާލިބާން ޓެރަރިސްޓުން ފޭރޯޒް ކޯހް ސިޓީގައި ހަޒާރާ ޝީއީންގެ ހަ މީހަކު ދުއްވަމުންދިޔަ އުޅަނދަކުން އެމީހުން ބޭރުކޮށް ބަޑި ޖަހައި މަރާލިކަމަށްވެސް ރިޕޯޓްކޮށްފައި ވެއެވެ.
