ތާލިބާނު ޓެރަރިސްޓް ޖަމާއަތުން ހަނގުރާމައިގެ ޖަރީމާތައް ހިންގަމުން ގެންދާކަމަށް އަފްޣާން ހިއުމަން ރައިޓްސް ކޮމިޝަނުން ތުހުމަތުކޮށްފިއެވެ. އަފްޣާން ހިއުމަން ރައިޓްސް ކޮމިޝަނުން ބުނެފައިވާ ގޮތުގައި ތާލިބާނުން ވަނީ ކަންދަހާރުގެ ސްޕިންބޯލްޑާކް ސަހަރު އެމީހުންގެ ބާރުގެ ދަށަށް ގެނައުމަށްފަހު، އެ ސަހަރުގައި ދިރިއުޅޭ ކުރީގެ ސަރުކާރުގެ މަސްއޫލުވެރިންނާއި މިހާރު ސަރުކާރުގެ މަސްއޫލުވެރިން ހޯދައި ޝަރީއަތަކާ ނުލައި އެމީހުން މަރާލާފައެވެ.
އިންޓަރނޭޝަނަލް ހިއުމެނިޓޭރިއަން ގާނޫނާ ޚިލާފަށް ތާލިބާނުން ހިންގާފައިވާ ޖަރީމާތައް އަފްޣާން ހިއުމަން ރައިޓްސް ކޮމިޝަނުން ވަނީ ޑޮކިއުމެންޓް ކޮށްފައެވެ. އަދި މަރާލާފައިވާ މީހުންގެ އާއިލާތަކާ އިންޓަރވިއުކޮށް މަޢްލޫމާތު އެއްކޮށްފައެވެ.
ތާލިބާނުން ސްޕިންބޯލްޑާކް ސަހަރު އެމީހުންގެ އަތްދަށަށް ގެންދިޔައީ ޖުލައި 14ގައެވެ. އަފްޣާނިސްތާން ސިފައިންގެ ހަމަލަތަކަށްފަހުވެސް އެމީހުންނަށް ސްޕިންބޯލްޑާކް ތާލިބާނުންގެ އަތްދަށުން މިނިވަން ކުރެވިފައެއް ނުވެއެވެ. ސްޕިންބޯލްޑާކަކީ ޕާކިސްތާން ސަރަހައްދާ އިންވެގެން އޮންނަ ސަހަރެކެވެ. މިއީ ކަސްޓަމްސް ޑިއުޓީން ރަނގަޅު އާމްދަނީއެއް ލިބޭ ތަނެކެވެ. މިތަނުން ނަގާ ހުރިހައި ވާރެއް މިހާރު ދަނީ ތާލިބާނުންނަށެވެ.
އަފްޣާނިސްތާން ހިއުމަން ރައިޓްސް ކޮމިޝަނުން ބުނާގޮތުން ތާލިބާނުން ވަނީ މީހުންގެ މުދާތައްވެސް ފޭރިގެންފައެވެ. އަދި ގެދޮރު ދޫކޮށް ގޮސްފައވާ މީހުންގެ ގެތަކަށްވެސް ވެރިވެގެންފައެވެ.
ހިއުމަން ރައިޓްސް ކޮމިޝަނުން ބުނާ ގޮތުން މިހާތަނަށް 40 މީހުން މަރާލާފައިވާ ކަމުގެ ހެކިތައް ޑޮކިއުމެންޓް ކުރެވިފައި ވެއެވެ.
