އިންޑިއާގައި ވައިގެ ދަތުރުފަތުރުގެ ދާއިރާއަށް ކޮވިޑާ ގުޅިގެން ބޮޑެތި ގެއްލުންތައް ލިބެމުންދާ ދުވަސްވަރެއްގައި، އިންޑިއާގެ ބިލިއަނަރަކު އައު އެއަރލައިނެއް ފެށުމަށް ނިންމައިފިއެވެ. ރާކޭޝް ޖުންޖުންވާލާއަކީ، އިންޑިއާގެ ހިއްސާގެ ބާޒާރުގައި މުއާމަލާތުކޮށްގެން ބިލިއަނަރަކަށްވެފައިވާ މީހެކެވެ. އޭނާ ހުށަހަޅާފައި ވަނީ، އޭނާގެ އަކާސާ އެއަރލައިންއަކީ އާދަޔާ ޚިލާފަށް އަގުހެޔޮ އެއަރލައިނަކަށް ހެދުމަށެވެ. އިންޑިއާގައި އަގުހެޔޮ އެއަރލައިންތަކުން އެތެރޭގެ އުދުހުންތަކުގެ 65އާއި 70އިންސައްތަ ކޮންޓްރޯލް ކުރެއެވެ.
މިދިޔަ ވިއްސަކަށް އަހަރު ދުވަހުގެ ތެރޭގައި އިންޑިއާގައި ކާމިޔާބު އެއަރލައިންތަކުގެ ތަރި މެދުޖެހި، އޮއްސިފައި ވެއެވެ. އިންޑިއާގެ ކުރީގެ އެންމެ މަޝްހޫރު އެއަރލައިނެއްކަމަށްވާ ޖެޓް އެއަރލައިންއިން 2019އިން ފެށިގެން ދަތުރު ކުރުން ހުއްޓާލައިފައި ވެއެވެ. ބިލިއެނަރ ވިޖޭ މައްލިޔާގެ ކިންގ ފިޝަރވެސް ވަނީ ބަނގްރޫޓްވެފައެވެ. އަނެއްކޮޅުން އެއަރ އިންޑިއާ އަމިއްލަ ފަރާތަކަށް ވިއްކުމަށް ސަރުކާރުން ކުރަމުންދާ މަސައްކަތް އަދި ކާމިޔާބު ވެފައެއް ނުވެއެވެ.
ވައިގެ ދަތުރުފަތުރުގައި އެންމެ ބޮޑު މައްސަލައަކީ، މަތިންދާބޯތަށް އަޅާ ތެލުގެ އަގު ބޮޑުވުމެވެ. އެއަރލައިނެއް ހިންގުމަށްދާ ޚަރަދުގެ 60 އިންސައްތައަކީ ތެލަށް ކުރާ ހޭދައެވެ.
އަކާސާ އެއަރލައިނާއެކު އެމެރިކާގެ އުދުހޭބޯޓު އުފައްދާ ބޯއިންގ ކުންފުންޏަށް އިންޑިއާގެ ވައިގެ ދަތުރުފަތުރުގެ ބާޒާރުގައި ބޮޑު ހިއްސާއެއް ލިބުމަކީ އެކަށީގެންވާ ކަމެކެވެ. ޖެޓްއެއަރވޭސް ހުއްޓުމާއެކު ބޯއިންގގެ އެންމެ ބޮޑު ކަސްޓަމަރު ވަނީ އެކުންފުންޏަށް ގެއްލިގައެވެ. އެއަށްފަހު އުފެދިގެން އައި އިންޑިގޯއިން ވަނީ އެއަރބަސްއަށް އިންޑިއާގެ ވައިގެ ދަތުރުފަތުރުގެ ބާޒާރުގައި ބޮޑު ޙިއްސާއެއް ދީފައެވެ.
