އިންޑިއާއާއި ބަންގްލަދޭޝްގެ ދެމެދު ކުރިން އޮޕަރޭޓް ކުރަމުން އައި ހުރިހައި ރެއިލްވޭތައް އޮޕަރޭޓް ކުރުމަށް ނިންމުމާ ގުޅިގެން ފަސްވަނައަށް ރޭލްވޭގެ ދަތުރުތައް މި މަހު ފަށައިފިއެވެ.
1947ގައި އިރުމަތީ ޕާކިސްތާން އުފެދުނު އިރު، އިންޑިއާއާއި ބަންގްލަދޭޝްއާ ދެމެދު ހަތް ރޭލްވޭ ލައިނަކުން ދަތުރުކުރަމުން ދިޔައެވެ. މިރެއިލްވޭގެ ޚިދުމަތް 1965ވަނަ އަހަރާ ހަމައަށް ދެމިއޮތެވެ. ދެގައުމުގެ ވެރިން އެއްބަސްވެފައި ވަނީ 1965އާ ހަމައަށް އޮތް ހުރިހައި ރެއިލްވޭއެއްގެ މަސައްކަތް ފެށުމަށް ކޮންމެ ގައުމަކުންވެސް އެގައުމުގެ ސަރަހައްދުގައި ކުރަން ޖެހޭ މަސައްކަތްތައް ކުރުމަށެވެ.
އިންޑިއާއިން ބަންގްލަދޭޝްއަށް ރޭލުޔ ދަތުރުތައް ފަށާއިރު، އިންޑިއާ ސަރަހައްދުން ގެންދެވެނީ ކަނޑައެޅިފައިވާ ވަކި ޚާއްސަ ބާވަތެއްގެ މުދާތަކެކެވެ. ނަމަވެސް ބަންގްލަދޭޝް ސަރަހައްދުން ބޭނުން ކޮންމެ އެއްޗެއް އިންޑިއާއަށް އެކްސްޕޯޓް ކުރެވެއެވެ.
އެންމެފަހުން ދަތުރުފަށާފައިވާ ހަލްދީބާރީ ޗިލާޓީ ރެއިލް ލިންކް މެދުވެރިކޮށް އިންޑިއާއިން އެކްސްޕޯޓް ކުރެވޭނީ ބޮޑު ހިލައާއި ހިލަވެއްޔާއި، ކެމިކަލްއާއި ތަރުކާރީގެ ބާވަތްތަކެވެ.
އިންޑިއާއާއި ބަންގްލަދޭޝްގެ ރެއިލްވޭ ގުޅާލުމުން އިންޑިއާގެ އުތުރުގެ އެކަހެރި ސްޓޭޓްތައް ކަމަށްވާ އާސާމްއާއި ވެސްޓްބެންގޯލް އަދި ޓްރީޕޫރާއާ ބަންގްލަދޭޝް ގުޅުވާލެވެއެވެ. މިރެއިލްވޭ މެދުވެރިކޮށް ދެފަރާތުން ފަތުރުވެރިންނާއި އާންމުންގެ ދަތުރުފަތުރަށް ފަސޭހަވެގެންދާނެ ކަމަށްވެސް މަސްއޫލުފަރާތްތަކުން ވިދާޅުވެއެވެ.
