އިންޑިއާގައި އެއަރކޮންޑިޝަނަރތައް އުފެއްދުމަށް ހިތްވަރުދިނުމަށް ޚާއްސަ އިމްތިޔާޒުތަކެއް ދިނުމަށް ނިންމުމަށްފަހު، ސަރުކާރުން އަމާޒުހިފާފައި ވަނީ، އިންޑިއާއަކީ އޭސީ އެކްސްޕޯޓްކުރާ ސަރަހައްދީ މައި މަރުކަޒަށް ވެގެން ދިއުމަށެވެ. ނިއްކީއޭޝިއާ ނޫހުން ބުނިގޮތުގައި ޑައިކިންއިން ވަނީ އިންޑިއާގެ އަންދްރަޕްރަދޭޝްގައި 136 މިލިއަން ޑޮލަރު އިންވެސްޓް ކުރުމަށް ނިންމާފައެވެ. އަދި އަލަށް ހަދާ ޑައިކިން ފެކްޓްރީން 2023ގައި އެކްސްޕޯޓް ކުރަން ފަށާނެ ކަމަށް އެނޫހުން ބުނެއެވެ. އާންދްރާގައި ޑައިކިން އިން ހަދާ ފެކްޓްރީއަކީ އިންޑިއާގައި ޑައިކިންއިން ބިނާކުރާ ތިންވަނަ ފެކްޓްރީއެވެ.
ޑައިކިން އިން ލަފާކޮށްފައި ވަނީ އަހަރެއްގެ މައްޗަށް ތިން މިލިއަން ޔުނިޓް އުފެއްދުމަށެވެ.
އިންޑިއާގެ އަމިއްލަ އޭސީ އުފައްދާ ކުންފުނިތައް ކަމަށްވާ ބުލޫ ސްޓަރއާއި ވޯލްޓާސްއިންވެސް ވަނީ އިތުރު ފެކްޓްރީތައް ހެދުމަށް އިންވެސްޓް ކުރުމަށް ނިންމާފައެވެ.
އެކްޕޯޓް ކުރުމަށް އޭސީ އުފައްދާ ކުންފުނިތަކަށް، އިންޑިއާ ސަރުކާރުން ވަނީ 850 މިލިއަން ޑޮލަރުގެ ސަބްސިޑީ ދިނުމަށް ނިންމާފައެވެ. ހަމައެއާއެކު އިންޑިއާއިން ވަނީ އޭސީ އިމްޕޯޓް ކުރުން މަނާކޮށްފައެވެ.
އިންޑިއާގައި އޭސީ ބޭނުންކުރާ ނިސްބަތް އުޅެނީ ވަރަށް ދަށުގައެވެ. ނިއްކީއިން ބުނިގޮތުގައި އިންޑިއާގައި އޭސީ ބޭނުންކުރަނީ އެންމެ ދިހަ އެއް އިންސައްތަ ގެތަކުގައެވެ.
