އިންޑިއާއިން ބޭނުންވަނީ ނިރުބަވެރިކަމުގެ ބިރެއް ނެތް، ސުލްޙަވެރި އަމާން ވެއްޓެއް ކަމަށާއި އެފަދަ މާހައުލެއް ގާއިމުކޮށް ދެވެން އޮތީ ޕާކިސްތާނަށް ކަމަށް އިންޑިއާއިން އދއަށް ކަނޑައަޅާފައިވާ ދާއިމީ މަންދޫބު ޓީއެސް ޓްރިމުރްތީ ހާމަކުރައްވައިފިއެވެ. އދގައި ވާހަކަ ދައްކަވަމުން އޭނާ ވިދާޅުވީ ދެގައުމުގެ ދެމެދުގައި ހުރި މައްސަލަތައް ޙައްލު ކުރެވޭނީ ސުލްޙަވެރި މާހައުލެއްގައި ކަމަށާއި އަދި ޕާކިސްތާނާއެކު މަޝްވަރާތައް ބޭއްވޭނީ ސަރަހައްދު ހުރަސްކޮށް ދޭ ހަމަލާތައް ހުއްޓާލައިގެން ކަމަށާއި މިކަން ހުއްޓުވުން އޮތީ ޕާކިސްތާންގެ އަތްމަތީގައި ކަމަށެވެ.
ޕާކިސްތާނުން ވަނީ ދެފަހަރެއްގެ މަތިން އިންޑިއާއާއެކު މަޝްވަރާއަށް ތައްޔާރަށް އޮތްކަމުގެ ސިގްނަލް ދީފައެވެ. ނަމަވެސް ފަހުން ބުނެފައި ވަނީ ކަޝްމީރުގެ ޚާއްސަ ހާލަތަށް ބަދަލުގެނައުމަށްޓަކައި އިންޑިއާއިން އުވާލާފައިވާ ގާނޫނުއަސާސީގެ މާއްދާ 370އަށް އަލުން އަމަލު ކުރަން ފެށުމުން ނޫނީ އިންޑިއާއާއެކު ވާހަކަތައް ނުބޭއްވޭނެ ކަމަށެވެ.
އިންޑިއާއިން ވަނީ އދގެ ސަލާމަތީ މަޖިލީހުގެ ރިއާސަތާ އާދީއްތަ ދުވަހުންފެށިގެން ހަވާލުވެފައެވެ. ހިނގަމުން މިދާ މަހުގައި، ސަލާމަތީ މަޖިލީހުގެ އެޖެންޑާއަށް ލުމަށް އިންޑިއާއިން ނިންމާފައި ވަނީ، ސުލްހަ ބެލެހެއްޓުމާއި، ކަނޑުގެ ސަލާމަތީ ކަންތައްތަކާއި، ނިރުބަވެރިކަމާ ދެކޮޅަށް ކުރާ މަސައްކަތާ ގުޅޭ މައުޟޫއުތަކެވެ.
