އަފްޣާނިސްތާންގައި އަންހެނުންގެ ހައްގަށް އަރައިގަންނަ ފަރާތްތަކުގެ ޝަރީއަތް ނުކުރެވޭކަމަށް ހިއުމަން ރައިޓްސް ވޮޗްއިން ބުނެއެވެ. އަފްޣާނިސްތާންގައި އަންހުންގެ ހައްގުތައް ޙިމާޔަތް ކުރުމަށް ގާނޫނެއް އެކުލަވާފައި ވަނީ 2009 ގައެވެ. މި ގާނޫނު ވުޖޫދަށް އައުމުން އަންހެން ލޯޔަރުންނާއި ޕްރޮސެކިއުޓަރުންނާއި ގާޒީން ވަނީ ތަމްރީނުކޮށް މަސައްކަތަށް ނެރެފައެވެ. އިންސާނީ ހައްގަށް މަސައްކަތް ކުރާ ފަރާތްތަކުން ބުނާ ގޮތުން އަފްޣާނިސްތާން ފަދަ އަންހެނުންގެ ހައްގަށް އިހުތިރާމް ކުރުމުގެ ސަގާފަތެއް ނެތް ގައުމަކަމަށް، މި ގާނޫނަކީ އެންމެ އެންމެ ހަރުދަނާ ގާނޫނެއް ނޫނެވެ.
މި ގާނޫނުގައި ވަނީ އަންހެނުންނާ ދެކޮޅަށް ހިންގާ 22 ވައްތަރެއްގެ ޖަރީމާއެއް ހިންގުމަކީ ޖިނާއީ ކުށަކަށް ހަދާފައެވެ. ހިއުމަން ރައިޓްސް ވޮޗްއިން ވަނީ 32 ސަފްޙާގެ ރިޕޯޓެއް ޝާއިއުކޮށްފައެވެ. މިރިޕޯޓްގައި ބުނެފައި ވަނީ އަންހެނުންގެ ހައްގު ހިމާޔަތް ކުރުމަށް ގާނޫނެއް އައިނަމަވެސް އަންހުނެނަށް ފުރިހަމަ ރައްކާތެރިކަމެއް އާއިލާގެ ތެރޭގައިވެސް އަދި މުޖުމަތައުގައިވެސް ދެވިފައި ނުވާކަމަށެވެ. އަދި ތާލިބާން ޓެރަރިސްޓުން އިތުރު ސަރަހައްދުތައް އެމީހުންގެ ބާރުގެ ދަށަށް ގެންނަމުން ދާއިރު، އަންހެނުންނަށް އިތުރު ގޮންޖެހުންތަކާއި ކުރިމަތިލާން ޖެހިފައި ވެއެވެ.
