އެކި ގައުމުތަކާއެކު ކޮށްފައިވާ އިންވެސްޓްމެންޓާ ގުޅޭ 23 އެއްބަސްވުމެއް އުވާލުމަށް ޕާކިސްތާނުން ނިންމައިފިއެވެ. ޕާކިސްތާނުން މިގޮތަށް ނިންމީ، ބޭރު ކުންފުނިތަކާއެކު ކޮންޓްރެކްޓްގެ މައްސަލާގައި އާބިޓްރޭޝަނަށް ދިނުމުން ސަލާމަތް ވުމުގެ ގޮތުންނެވެ.
ޕާކިސްތާނާ ދެކޮޅަށް މިހާރުވެސް އެކިއެކި ގައުމުތަކުގައި އާބިޓްރޭޝަން މަރުޙަލާގައި ދިހަ މައްސަލައެއް ދަނީ ހިނގަމުންނެވެ. މިއިން ޕާކިސްތާނުން އެތައް ބިލިއަން ޑޮލަރެއް ބަދަލުގައި ހޯދުމަށް ދައުވާ ކޮށްފައި ވެއެވެ.
މި 23 އެއްބަސްވުމެއް އުވައިލި ނަމަވެސް ޕާކިސްތާނުން ވަނީ އިތުރު ނުވަ އެއްބަސްވުމަށް ކަމާ ގުޅުން ހުރި ގައުމުތަކާއި މަޝްވަރާކޮށްގެން ބަދަލު ގެނައުމަށްވެސް ނިންމާފައެވެ. މީގެ އިތުރުން 16 އެއްބަސްވުމެއްގައި ސޮއި ނުކުރާންވެސް ޕާކިސްތާނުން ވަނީ ނިންމާފައެވެ.
ޕާކިސްތާނުގައި އިންވެސްޓްމެންޓަށް ހުއްދަ ދިނުމާއި އިންވެސްޓްމެންޓާ ގުޅޭ އެއްބަސްވުމަށް ބަދަލު ގެނައުމާއި އުވާލުމުގެ ބާރު އޮންނަނީ ބޯޑް އޮފް އިންވެސްޓްމެންޓްގައެވެ.
ޕާކިސްތާނުން އެންމެ ފުރަތަ އިންވެސްޓްމެންޓާ ގުޅޭ އެއްބަސްވުމެއް ހަދާފައި ވަނީ 1959ގައި ޖަރުމަންވިލާތާއެކުގައެވެ. މިހާތަނަށް 48 ގައުމަކާއެކު 53 އިންވެސްޓްމެންޓާ ގުޅޭ އެއްބަސްވުން ހަދާފައި ވެއެވެ.
މިފަހަކަށް އައިސް އިންވެސްޓަރުންނާއި ޕާކިސްތާނާ ދެމެދު މައްސަލަތައް އުފެދޭތީ އައު އިންވެސްޓްމެންޓް އެއްބަސްވުންތަކުގައި ސޮއިކުރުމަށް ބޭރުގެ ފަރާތްތަކުން ފަސް ޖެހެއެވެ.
