ޕާކިސްތާނުގައި އަނެއްކާވެސް ފޭކް ޑިގްރީއާއި ޑިޕްލޮމާ ދިނުމުގެ ވިޔަފާރި އާންމުވެފައިވާ ކަމަށް ބުނެ، އޮންލައިން ކޮށް އުގަންނައިދިނުމުގެ ނަމުގައި ހަދާފައިވާ ވެބްސައިޓްތަކަށް ސަމާލުވުމަށް ޕާކިސްތާންގެ ދަ ނިއުސް އިންޓަރނޭޝަނަލް އިން އިންޒާރުކޮށްފިއެވެ. މިހާރުވެސް ފޭކް ޑިގްރީއާއި ޑިޕްލޮމާގެ މަސައްކަތް ފަށާފައިވަނީ ކުރިންވެސް ކަރާޗީގައި މި ވިޔަފާރިކޮށްގެން ބަންދުކޮށްފައިވާ އޮފީހުންނެވެ. މީގެ ދެއަހަރު ކުރިން ޕާކިސްތާންގައި އާންމުވެގެން ދިޔަ މަކަރާއި ހީލަތުން ދަރިވަރުންގެ އަތުން ގިނަ އަދަދަކަށް ފައިސާ ހޯދި މިކުންފުނީގެ ވިޔަފާރި ބަންދުކޮށް މިކަމުގައި އުޅުނު މުޖުރިމުންނަށް އަދަބު ދީފައި ވެއެވެ.
ޓީކާވް ވެބްސައިޓް މެދުވެރިކޮށް ބޭރުގެ ޔުނިވަރސިޓީގެ ނަންނަމުގައި ޑިގްރީ ޕްރޮގްރާމުތައް ހިންގާކަމަށް ބުނެއެވެ. މިމީހުން ބުނާ ގޮތުން އެމީހުންނާ ގުޅީފައިވާ އުގަންނައިދޭ މުއައްސަސާތަކަކީ، www.calbrooksuniversity.education, www.mountwilliam.university www.rfu.education, އެވެ. މިއިން އެއްވެސް ތަނަކީ ވުޖޫދުގައިވާ ތަންތަނެއް ނޫނެވެ.
ޕާކިސްތާނު ފުލުހުންނަށްވެސް މިމީހުންގެ މަޢުލޫމާތު ލިބިގެން މިކަން ތަހުގީގު ކުރަން ފަށާފައި ވެއެވެ.
ތަހުގީގަށް ލިބިފައިވާ މަޢުލޫމާތުން އެނގޭ ގޮތުގައި އިސްލާމްއާބާދާއި ކަރާޗީގައި މި ވިޔަފާރި ހިންގުމަށް 900 އެއްހައި މީހުންނަށް ވަޒީފާ ދީފައި ވެއެވެ. އަދި މިއަހަރުގެ ޖޫން މަހު އެކަނިވެސް މިކުންފުންޏަށް މަކަރާއި ހީލަތުން 1.8 މިލިއަން ޑޮލަރު ލިބިފައި ވެއެވެ. އަދި ޖުލައި މަހު 2.1 މިލިއަން ޑޮލަރު ލިބުނެވެ.
ތަހުގީގަށް ހޯދަން އުޅުމުގެ ތެރޭގައި މިކުންފުނީގެ އިސްފަރާތްތައް ވަނީ ފިލައިގެން ޑުބާއީއަށް ގޮސްފައެވެ. އަދި ޑުބާއީން މިމީހުން ޕާކިސްތާނަށް ގެނެވޭ ގޮތެއް ނުވިކަމަށްވެސް ދަ ނިއުސްގައި ބުނެފައި ވެއެވެ.
