ުމުރުން 21 އަހަރުގެ އަންހެން ކުއްޖަކު މޫނު ބުރުގާ އެޅުމާ ދެކޮޅު ހެދުމުން ތާލިބާނުން އެކުއްޖާ މަރާލައިފިއެވެ.
އަފްޣާނިސްތާން ޓައިމްސްގައި ރިޕޯޓް ކޮށްފައިވާ ގޮތުގައި އުމުރުން 21 އަހަރުގެ ނާޒްނީން ދިޔައީ ކާރުގައި ބަލަޚްގެ ސިޓީ ސެންޓަރއަށެވެ. ތާލިބާނުން އޭނާއަށް މޫނު ބުރުގާ އެޅުމަށް އެންގުމުން އެކަމާ ދެކޮޅު ހެދުމުން ޓެރަރިސްޓް ޖަމާއަތުގެ މީހުން އޭނާގެ ގަޔަށް ބަޑި ޖަހައި މަރާލީއެވެ.
ތާލިބާނުން ދަނީ އެމީހުން ހިފާ ސަރަހައްދުތަކުގައި ކުރަފަތާއި ރޭޒަރުތައް މަނާކުރަމުން، އިސްތަށި ބޯ ތުނބުޅި ދިގުކުރުމަށް މީހުންނަށް އިރުޝާދު ދެމުންނެވެ. އަދި އަންހެނުން ބޮލުން ފަޔާހަމައަށް ނިވާކޮށްގެން ތިބުމަށާއި މަހުރަމަކާ ނުލައި ގެއިން ބޭރު ނުވުމަށްވެސް އަންގަމުންނެވެ.
ކާބުލް ސިޓީން ތާލިބާނުން ފައްސާލުމާ ހަމައަށް 1996ން 2001އަށް އެމީހުން ވެރިކަން ކުރަމުން ދިޔައީ އިސްލާމީ ޝަރީއަތުގެ ނަމުގައި ހައްދުފަހަނައަޅާފައި އޮތް ހަރުކަށި އުސޫލުތަކެއްގެ ތެރޭންނެވެ. އަފްޣާން ޓައިމްސްއިން ބުނާ ގޮތުން ފަރިޔާބުގައި ތާލިބާނުގެ އަމުރު މައުރޫފު ހިންގާ މީހުން ވަނީ އެކަނި ފިހާރައަށްދާ އެއްވެސް އަނެނަކާއެކު ވިޔަފާރި ނުކުރުމަށް ފިހާރަތަކަށް އަންގާފައެވެ. އަދި މިއުސޫލާ ޚިލާފްވާ ފިހާރަވެރިންގެ ގައިގައި ތަޅައި ހަދާކަމަށްވެސް ރިޕޯޓުކޮށްފައި ވެއެވެ.
