ތާލިބާންގެ ޓެރަރިޒަމް އިތުރުވަމުން ދިއުމާއެކު، އަފްޣާނިސްތާން ރެފިއުޖީން ޕާކިސްތާނަށް ހިޖުރަކުރަން ބޭނުންވާނަމަ އެމީހުންނަށް ޕާކިސްތާންގެ ސަރަހައްދު ހުޅުވާފައި ބޭއްވުމަށް އެމެރިކާއިން ޕާކިސްތާންގައި އެދެފިއެވެ.
އެމެރިކާގެ ޚާރިޖީ ވުޒާރާގައި ނޫސްވެރިންނަށް މަޢުލޫމާތު ދެއްވަމުން ތަރުޖަމާން ވިދާޅުވީ، އަފްޣާނިސްތާންގެ އުތުރު ސަރަހައްދުން ބޭރުވާ މީސްމީހުން އީރާނަށް ވަދެގެން އީރާންގެ މަގުން ތުރުކީއަށް އެތެރެވުން ރަގަޅުވާނެ ކަމަށެވެ. އަދި އެގޮތަށް އެތެރެވާ ފަރާތްތަކުން ސަރުކާރުގައި ރަޖިސްޓްރީ ވުމަށް ނުވަތަ ރެފިއުޖީންނާ ބެހޭ އދގެ އިދާރާ ޔޫއެންއެޗްސީއާރްގައި ރަޖިސްޓްރީވުމަށް އެދިފައި ވެއެވެ.
ޑޯން ނޫހުން ބުނެފައިވާ ގޮތުގައި 1979ން ފެށިގެން ގިނަ އަދަދެއްގެ އަފްޣާން ރެފިއުޖީންނަށް ޕާކިސްތާނުން ހިޔާވަހިކަން ދިން ނަމަވެސް މިހާރު އެފަދަ ކަމެއް ކުރާން ޕާކިސްތާނުން ފަސް ޖެހެއެވެ. ޕާކިސްތާން މަސްއޫލުވެރިން ވިދާޅުވަނީ ޕާކިސްތާންގެ އިގްތިސާދުގައި އެފަދަ އެހީއެއް ވެދެވޭވަރުގެ ހަކަތައެއް ނެތް ކަމަށެވެ.
ޕާކިސްތާންގެ ގައުމީ ސަލާމަތާ ބެހޭ މުޝީރު ޔޫސުފް މުއީދު، އެމެރިކާގައި ވާހަކަ ދައްކަވަމުން ވިދާޅުވީ، އަފްޣާން ރެފިއުޖީން ޕާކިސްތާނަށް އަޅާލުމަށް ވުރެން ރަގަޅުވާނީ އެމީހުން އަފްޣާނިސްތާންގެ ތެރޭގައި ބޭތިއްބުމެވެ.
އަފްޣާނިސްތާންގައި އެމރިކާ ސިފައިންނަށް އެހީތެރިވި ތަރުޖަމާނުންނާއި އެހެނިގެން ފަންނީ ފަރާތްތަކަށް އެހީތެރިވުމުގެ ގޮތުން އެމެރިކާއިން ދަނީ އެމެރިކާއަށް އެތެރެވުމަށް އެފަރާތްތަކަށް ޚާއްސަ ވިޒާއެއް ދިނުމަށް މަސައްކަތް ކުރަމުންނެވެ.
