ކަޝްމީރުގައި ޒުވާނުން ގޮލްފްކުޅުމަށް ހިތްވަރު ދިނުމުގެ ގޮތުން ތަމްރީން ޕްރޮގްރާމުތަކެއް ފަށައިފިއެވެ. 2014ގައި ދިމާވި ފެން ބޮޑުވުމަށްފަހު ކަޝްމީރުގެ ގޮލްފް ކޯސް ހަލާކުވެގެން މިއަދާ ހަމައަށް އޮތީ ބަންދުކޮށްފައެވެ. ސަރުކާރުން ވަނީ އަލުން މަރާމާތަށް ފަހު މިމަހު، ގޮލްފް ކޯސް ހުޅުވާފައެވެ.
ކަޝްމީރުގައި އައު ގޮލްފް އެކަޑެމީއެއް ހުޅުވުމާއެކު ފެށި ފުރަތަމަ ތަމްރީން ޕްރޮގްރާމުތަކުގައި ގިނަ އަދަދެއްގެ ޒުވާނުންނާއި ސްކޫލު ދަރިވަރުން ވަނީ ބައިވެރިވެފައި ވެއެވެ.
އަގު ބޮޑު ކުޅިވަރެއް، މެދު ފަންތީގެ މީހުންގެ އަތްފޯރާ ފަށަށް ގެނަސްދިނުމުން އާންމުން ވަނީ އެކަން ފާހަގަ ކޮށްފައެވެ.
ކަޝްމީރުގައި ގޯލްފް ޓްރެއިނިންގގައި ހަރަކާތްތެރިވާ ފަޔާޒް އަޙުމަދު ކިޔައިދިން ގޮތުގައި ހީވެސް ނުކުރާހާ ގިނަ އަދަދަކަށް ޒުވާނުން ވަނީ 15 ދުވަހުގެ ޓްރެއިނިންގ ޕްރޮގްރާމުގައި ބައިވެރި ވެފައެވެ. އޭނާ ބުނިގޮތުގައި މީގެ ސަބަބުން ކަޝްމީރު ވާދީގައި ގޮލްފްގެ ކުޅިވަރަށް އައު ހިތްވަރެއް ލިބިގެންދާނެއެވެ.
