އަފްޣާނިސްތާންގައި ތާލިބާނުން ހަނގުރާމައިގެ ހާލަތު ފުޅާކުރަމުން އިންސާނީ ހައްގަށް އަރައިގަންނަމުންދާ ކަމަށާއި، ބައިނަލްއަގްވާމީ ހިއުމަނިޓޭރިއަން ގާނޫނު ބޮލާލައި ޖަހައި މީހުން މަރައި ބިކަ ކުރަމުން ގެންދާ ކަމަށް އަފްޣާނިސްތާންގެ ޚާރިޖީ ވަޒީރު މުޙައްމަދު ޙަނީފް އާޓްމާރް ވިދާޅުވެއެވެ. ފޯނުން ގުޅުއްވައި އިންޑިއާގެ ޚާރިޖީ ވަޒީރު އެސް ޖަޔަޝަންކަރާ ވާހަކަ ދައްކަވަމުން އާޓްމާރް އެދިވަޑައިގަތީ، އަފްޣާނިސްތާންގެ މައްސަލަ އދގެ ސަލާމަތީ މަޖިލީހުގައި އެޖެންޑާކޮށް ދެއްވުމަށެވެ.
އާޓްމާރް ވިދާޅުވާ ގޮތުގައި އަފްޣާނިސްތާންގައި ތާލިބާނުން ހަމަލަތައް ދެމުންދާއިރު އެމީހުންނާ އެކު ބޭރުގެ ކުލީ ހަނގުރާމަވެރިންވެސް ބައިވެރިއެވެ. އަދި ތާލިބާނުން އިންސާނީ ހައްގަށް ޙުރުމަތެއް ނުބަހައްޓާ ކަމަށްވެސް އޭނާ ވިދާޅުވިއެވެ. ތާލިބާނާ ދެކޮޅަށް ފިޔަވަޅު ނައަޅައިފިނަމަ، އަފްޣާނިސްތާނުގެ އެތައް ބަޔަކު ބިކަވެ، ހާލުގައި ޖެހި ގެދޮރު ނެތިގެން ހިނގައިދާނެ ކަމަށްވެސް އާޓްމާރް ވިދާޅުވިއެވެ.
ޖަޔަޝަންކަރު ވަނީ އަފްޣާނިސްތާންގައި އިތުރު ވަމުންދާ ހަމަލަތަކާ މެދު ނުތަނަވަސްކަން ފާޅުކުރައްވާފައެވެ. އޭނާ ވިދާޅުވީ އަފްޣާނިސްތާންގެ ހާލަތު އިންޑިއާއިން ވަރަށް ގާތުން މޮނީޓަރ ކުރަމުންދާ ކަމަށެވެ.
އިންޑިއާއިން ވަނީ މިމަހުން ފެށިގެން އދގެ ސަލާމަތީ މަޖިލީހުގެ ދެ އަހަރުގެ ދައުރެއް ފަށާފައެވެ.
