އަފްޣާނިސްތާންގެ ސަރުކާރުގެ މީޑިއާ އިދާރާގެ އިސްވެރިޔާ ދާވާ ޚާން މަނަޕާލް، ތާލިބާނުން މަރާލައިފިއެވެ. ހުކުރު ދުވަހު އޭނާ މަރާލާފައި ވަބނީ ކާބުލްގެ ދާރުލް އަމާން ސަރަހައްދުގައެވެ.
ދާވާ ޚާނަކީ، އަފްޣާން ސަރުކާރުގެ މީޑިއާ ސެންޓަރުގެ އިސް މަގާމާ ހަވާލު ވުމުގެ ކުރިން ކަންދަހާރުގައި 2015އާ ހަމައަށް ސަރުކާރުގެ މީޑިއާ އިދާރާ ބެލެހެއްޓި މީހާއެވެ. އޭގެ ކުރިން ނޫސްވެރިއެއްގެ ހައިސިއްޔަތުން އޭނާ ވަނީ ރޭޑިއޯ އާޒާދީގައި މަސައްކަތް ކޮށްފައެވެ.
އަފްޣާނިސްތާންގައި އިތުރުވަމުންދާ ހަމަނުޖެހުމުގައި ތާލިބާނުން ގެންދަނީ މިހާރާއި ކުރީގައި ސަރުކާރުގެ މަސްއޫލު މަގާމުތަކުގައި ތިބި ފަރާތްތައް ހޯދައި އެފަރާތްތައް ނައްތާލުމަށް މަސައްކަތް ކުރަމުންނެވެ.
