ތާލިބާނުން އަފްޣާނިސްތާންގެ ސަރުކާރު ވައްޓާލައި ތާލިބާންގެ ޚިލާފަތުގެ ސަރުކާރެއް ގާއިމްކޮށްފިނަމަ ބައިނަލްއަގްވާމީ މުޖުތަމައިން އެ ސަރުކާރެއް ބަލައި ނުގަންނާނެ ކަމުގެ އިންޒާރު ވިލާތު އިއްތިޙާދުން ދީފިއެވެ.
ދޯޙާގައި ތާލިބާން ގްރޫޕްގެ މުއްލާއިންނާއެކު ބާއްވާފައިވާ ބައްދަލުވުމުގައި ޔޫރަޕްގެ އެކްސްޓާނަލް އެކްޝަން ސަރވިސްގެ ޑެޕިއުޓީ ޑިރެކްޓަރ އެންރީކޭ މޯރާ ވިދާޅުވީ ތާލިބާނުން އަފްޣާނިސްތާންގައި ހަނގުރާމަ ފުޅާކުރަމުން ހަމަނުޖެހުމަކަށް ވައްޓާލައިފިނަމަ، ބައިނަލްއަގްވާމީ މާލީ ނިޒާމުން އަފްޣާނިސްތާން އެކަހެރި ވެގެންދާނެ ކަމަށެވެ. އެފަދަ ހާލަތެއް މެދުވެރިވެއްޖެނަމަ، އެހީދޭ ފަރާތްތަކުން އެހީ ދިނުން ހުއްޓާލާނެ ކަމަށާއި އަފްޣާނިސްތާން އެކަހެރިކަމެއްގެ ތެރެއަށް ވެއްޓިގެން ދާނެ ކަމަށެވެ.
ތާލިބާން ގްރޫޕުން ހިފަމުންދާ އަފްޣާނިސްތާންގެ ސަރަހައްދުތަކުގައި އެމީހުން ދަނީ އިސްލާމީ ޝަރީއާގެ ނަމުގައި ހައްދުފަހަނަޅާފައިވާ ހަމައެއް ލަމެއް ނެތް އުސޫލުތައް ގާއިމްކޮށް މީހުންގެ ފުރާނައަށް ނުރައްކާ ކުރަމުންނެވެ.
ތާލިބާނުން ހިފާ ސަރަހައްދުތަކުގައި ކުރަފަތާއި ރޭޒަރުތައް ވިއްކުން މަނާކޮށް، އިސްތަށި ބޯ ތުބުޅި ދިގުކޮށް، ބޮލުން ފަޔާހަމައަށް އަންހެނުން ނިވާ ކުރުމަށާއި މަހުރަމަކާ ނުލައި ގެއިން ބޭރަށް ނިކުތުން މަނާ ކުރަމުން ދެއެވެ. އަންހެނުން ގޭގައި ތިބުމަށް މަޖުބޫރު ކުރާއިރު އަންހެން ކުދިން އިސްކޫލަށް ދިއުމަށްވެސް ދަނީ ހުރަސް އަޅަމުންނެވެ. ތާލިބާންގެ އެންގުމަށް ނުކިޔަމަންތެރވާ މީހުން އާންމު މައިދާންތަކުގައި ދުއްރައިން ތެޅުމާއި ބަޑި ޖައި މެރުންފަދަ ކަންކަމަކީ މިހާރު އާންމު ކަންކަމެކެވެ.
