އެމެރިކާގެ ޖޯންސަން އެންޑް ޖޯންސަންއިން އުފައްދާފައިވާ އެއް ޑޯޒު ޖަހައިގެން ކޮވިޑް19 ވާބާއިން ރައްކާތެރިކޮށްދޭ ވެކްސިންއަށް ކުއްލި ހާލަތުގައި ބޭނުން ކުރުމުގެ ހުއްދަ އިންޑިއާއިން ދީފިއެވެ. މިއާއެކު އިންޑިއާގައި ކުއްލި ހާލަތުގައި ބޭނުން ކުރުމަށް ހުއްދަ ދީފައިވާ ވެކްސިންގެ އަދަދު ފަހަކަށް އެރީއެވެ.
އިންޑިއާގައި ޖޯންސަން އެންޑް ޖޯންސަންގެ ވެކްސިން އާމުކޮށް ފެތުރުމަށް މަސައްކަތް ކުރާނީ އިންޑިއާގެ ވެކްސިން އުފައްދާ ކުންފުންޏެއް ކަމަށްވާ ބައެލޮޖިކަލް އީ ލިމިޓެޑުންނެވެ.
މި ވަގުތު އިންޑިއާގައި ހުއްދަ ދީފައިވާ ވެކްސިންއަކީ ސެރަމް އިންސްޓިއުޓުން އުފައްދާ ކޯވިޝީލްޑާއި ބާރަތު ބައޯޓެކްގެ ކޯވެކްސިންއާއި ރަޝިޔާގެ ސްޕުޓްނިކްއާއި މޮޑާނާ ވެކްސިންއެވެ.
އިންޑިއާގައި ވެކްސިން ޖަހާފައިވާ މީހުންގެ އަދަދު 500 މިލިއަނަށް އަރައިފިއެވެ. މިދިޔަ 24 ގަޑި އިރު ތެރޭވެސް ފަސް މިލިއަން ވެކްސިން ޖަހާފައިވާ ކަމަށް މީޑިއާ ރިޕޯޓްތައް ބުނެއެވެ.
