އިޒްރޭލުން އުފައްދާފައިވާ ފުޅާ ދާއިރާއެއްގައި މީހުންގެ ފޯނަށް ޖާސޫސްކުރާ ސޮފްޓްވެއަރ ބޭނުންކޮށްގެން 17 ނޫސްވެރިއަކަށް ޖާސޫސް ކުރި މައްސަލަ ތަހުގީގު ކުރުމަށް ޕެރިހުގެ ޕްރޮސެކިއުޓަރ އޮފީހަށް ވައްދައިފިއެވެ. މީގެ އިތުރުން ރިޕޯޓާޒް ވިތު އައުޓް ބޯޑަރޒްއާއި މޮރޮކޯއާއި ފަރަންސޭސި ރަސްވެހިކަން ގެންގުޅޭ ދެ ނޫސްވެރިއަކުވެސް ވަނީ މިމައްސަލަ ތަހުގީގުކުރުމަށް އެދި ޕެރިހުގައި އެދިފައެވެ.
ރިޕޯޓަރޒް ވިއުއައުޓް ބޯޑަރޒް އިން ވަނީ މިމައްސަލަ އދގެ ސަމާލުކަމަށްވެސް ގެންގޮސްފައެވެ. މިއިން ބައެއް ނޫސްވެރިންނަކީ އެމީހުންގެ އަމިއްލަ ސަރުކާރުތަކުންވެސް އެމީހުންގެ މައްޗަށް ސަބަބަކާ ނުލައި ޖާސޫސްކޮށްފައިވާ މީހުންނެވެ. އަނެއް ބައި މީހުންނަކީ، ބިދޭސި ސަރުކާރުތަކުން ޖާސޫސްކޮށްފައިވާ މީހުންނެވެ.
އިޒްރޭލްގެ ޕެގަސަސް ސޮފްޓްވެއަރ ބޭނުންކޮށްގެން ޖާސޫސްކޮށްފައިވާކަމަށް ބުނެ ޝަކުވާ ހުށަހެޅި މި 17 ނޫސްވެރިންނަކީ އަޒަރްބައިޖާނާއި ހަންގެރީގެ ހަތަރު ނޫސްވެރިއަކާއި އިންޑިއާއާއި މެކްސިކޯގެ ދިހަ ނޫސްވެރިއަކާއި މޮރޮކޯއާއި ސްޕެއިންއާއި ޓޯގޯގެ ނޫސްވެރިއެކެވެ.
މިމީހުންގެ އިތުރުން 200އެއްހައި ނޫސްވެރިންނާއި ވަޒީރުންނާއި ޖަޖުންނާއި މަސްއޫލުވެރިންނާއި އެމްޕީންނަށް ޖާސޫސްކޮށްފައިވާ ކަމަށް ތުހުމަތުކޮށްފައި ވެއެވެ. މިމައްސަލަ ދަނީ އެތައް ގައުމެއްގައި ތަހުގީގު ކުރަމުންނެވެ.
އިންޑިއާގެ އިދިކޮޅު ފަރާތްތަކުން މިމައްސަލަ ޕާލަމެންޓްގައި ބަހުސްކުރަން އުޅުމުން ސަރުކާރުން ބުނެފައި ވަނީ މިމައްސަލާގައި ޕާލަމެންޓްގައި ބަހުސް ނުކުރެވޭނެ ކަމަށެވެ. އިންޑިއާއަކީ ޕެގަގަސް ޖާސޫސް ކުރުމުގައި އެގައުމުގެ ގިނަބަޔަކު ޝިކާރައަކަށްވި ގައުމެކެވެ.
