އިންޑިއާއާއި އާސިއާންއާ ދެމެދު ސޮއިކޮށްފައިވާ ވިޔަފާރފި އެއް ބަސްވުން ފުރިހަމައަށް ތަންފީޒުކުރުމުގެ ގޮތުން އާސިއާންގެ ގައުމުތަކާ އިންޑިއާ އެއްގަމު މަގުން ގުޅާލުމުގެ މަސައްކަތް އަވަށް ކުރުމަށް އިންޑިއާގެ ޚާރިޖި ވަޒީރު އެދިވަޑައިގެންފިއެވެ. އިންޑިއާ އާސިއާންގެ ވިޔަފާރި އެއްބަސްވުމަށް އަމަލު ކުރަން ފެށީ 2010 ޖެނުއަރީ މަހުން ފެށިގެންނެވެ.
އިންޑިއާއާއި އާސިއާންގެ ގައުމުތައް ގުޅުވާލުމަށްޓަކައި ތިން ގައުމު ބައިވެރިވާ ހައިވޭއެއްގެ މަސައްކަތްވެސް އިންޑިއާއިން ވަނީ ފަށާފައެވެ. އެއީ އިންޑިއާގެ މަނިޕޫރުން މިޔަންމާރ ތެރެއިން ލައިގެން ތައިލެންޑަށްދާ ތިން ގައުމު ބައިވެރިވާ ހައިވޭއެވެ. މީގެ އިތުރުން އިންޑިއާގެ ކޮލްކަޓާ ޕޯޓާއި މިޔަންމާރގެ ސިއްޓުވޭ ޕޯޓު ގުޅުވާލުމުގެ މަޝްރޫއެއްގައިވެސް އިންޑިއާއިން ދަނީ މަސއްކަތް ކުރަމުންނެވެ.
އިންޑިއާގެ ފޮރިން މިނިސްޓަރ އެސް ޖަޔަޝަންކަރު ވަނީ އާސިއާންގެ ޚާރިޖީ ވަޒީރުން ބައިވެރިވެ ވަޑައިގަތް މަޖާޒީ ބައްދަލުވުމެއްގައި އިއްޔެ ވާހަކަ ދައްކަވާފައެވެ.
އިންޑިއާއިން ވަނީ މިޔަންމާރއިން ތައިލެންޑަށް އޮންނަ 1360 ކިލޯމީޓަރުގެ ހައިވޭ ބިނާ ކުރުމަށް މަސައްކަތް ކޮށްފައެވެ. ނަމަވެސް މި ހައިވޭގެ އެތައް ބައެއްގެ މަސައްކަތް އަދިވެސް ވަނީ ހިސާބުގަނޑުގެ ހަމަނުޖެހުންތަކާއި ހެދި ނިންމާ ނުލެވިފައެވެ. އޭގެ ތެރޭގައި ހައިވޭގައި ހިމެނޭ 70 ބްރިޖެއްގެ މަސައްކަތް ހިމެނެއެވެ.
މި ހައިވޭ ފެށެނީ އިންޑިއާގެ މަނިޕޫރުގެ މޯރެހް ޓައުނުންނެވެ. މިޔަންމާރގެ ތެރޭން ލައިގެން ގޮސް މި ހައިވޭ ނިމެނޭނީ ތައިލެންޑްގެ މާއެ ސޮޓް ޓައުނަށެވެ. އިންޑިއާއިން ބުނަނީ މި ހައިވޭގެ މަސައްކަތް ނިމުމުން އިންޑިއާ ސަބްކޮންޓިނެންޓާއި އާސިއާންގެ ގައުމުތައް ގުޅުވާލެވި މީހުންނަށް ފަސޭހަކަމާއެކު ދަތުރުފަތުރުކުރުމަށް ފަސޭވަހެވެގެން ދާނެއެވެ.
އިންޑިއާއިން ދެކޭ ގޮތުގައި އިންޑިއާގެ ވިޔަފާރި މުދަލަށް ބޮޑި ބާޒާރެއް ލިބެން އޮތީ އާސިއާންގެ މާރުކޭޓްތައް އިންޑިއާއަށް ހުޅުވިގެންނެވެ. އިންޑިއާއިން މަޝްވަރާ ކުރަމުން ދަނީ އިންޑިއާއިން އެކްސްޕޯޓް ކުރާ މުދަލުގެ ޑިއުޓީ 70 ޕަސެންޓަށް ދަށްކުރެވި، ކަސްޓަމްސްއާއި އެހެނިހެން އެކްސްޕޯޓާ ގުޅޭ ގަވާއިދުތައް އެންމެންގެ މެދުގައި އެއްގޮތް ކުރެވޭތޯއެވެ.
އާސިއާންއާއި އެއްގަމު މަގުން ގުޅުވާލެވޭ އިރު އިންޑިއާއިން ދަނީ ކޮންޓެއިނާ މުދާ ކޮލްކަޓާ ޕޯޓުން މިޔަންމާރގައި އިންޑިއާއިން ހަދާ ޕޯޓަށް ގެންދެވޭ ގޮތަށް ހެދުމަށްވެސް މަސައްކަތް ކުރަމުންނެވެ. މިޔަންމާރގައި ހަދާ ބަނދަރަކީ މައްސަލަ ބޮޑު ރާކީން ސްޓޭޓްގައި ހަދާ ބަނދަރެއްކަމުން ހަނގުރާމަވެރިންގެ ސަބަބުން މިޔަންމާރ ފަޅީގައި މަސައްކަތް ހުއްޓިފައި ވެއެވެ. އަދި ކޮލްކަޓާ ސަރަހައްދުގައިވެސް ބިން ގަތުމަށް އިންޑިއާ ސަރުކާރަށް ދިމާވެފައިވާ ގޮންޖެހުންތަކާ ހެދި އަވަސްގޮތަކަށް މި މަޝްރޫއު ކުރިއަކަށް ނުދެއެވެ.
2000 ވަނަ އަހަރު އިންޑިއާއިން ލަފާކޮށްފައި އޮތީ އިންޑިއާއާއި ތައިލެންޑާ ގުޅުވާލާ ހައިވޭ 2020ގައި ހުޅުވިގެންދާނެ ކަމަށެވެ.
