އަފްޣާނިސްތާންގައި ތާލިބާނުން ބާރުގަދަ ވަމުން ދިއުމުގެ ސަބަބުން ޓެރަރިސްޓް ޖަމާއަތްތަކުން ތާލިބާން ކޮޕީކޮށްގެން ހިތްވަރު ލިބިގަންނާނެ ކަމަށާއި މިކަމުގެ ސަބަބުން ޕާކިސްތާނަށް ނުރައްކާވާނެ ކަމަށް އިންޒާރުކޮށްފިއެވެ. ދުވަހު ނޫސް ޑޯންގައި ލިޔުއްވަމުން، ސަލާމަތީ ކަންތައްތަކާ ބެހޭ ތަޖުރިބާކާރު މުޙައްމަދު ޢާމިރު ރާނާ ވިދާޅުވީ، ތާލިބާނުން ބާރުގަދަވުމުން އަފްޣާނިސްތާންގައި ސުލްޙައިގެ ފުރުސަތުވެސް ގެއްލިގެންދާނެ ކަމަށެވެ. އަދި ތާލިބާނުންގެ ސަބަބުން ޕާކިސްތާނާއި އަފްޣާނިސްތާނާއި އިންވެގެންވާ ގަބީލާ ސަރަހައްދުތަކާއި ޕާކސްތާންގެ ދާޚިލީ ސަލާމަތަށްވެސް ނުރައްކާތަކެއް ކުރިމަތިވާނެ ކަމަށެވެ.
މުޙައްލިލު ރާނާ ވިދާޅުވިގޮތުގައި ތާލިބާނުންގެ ސަބަބުން ހުރިހައި ވައްތަރެއްގެ ޓެރަރިސްޓުންވެސް ހިތްވަރު ލިބިގަންނާނެއެވެ. މިސާލަކަށް އޭނާ ހގެކި ދެއްކެވީ، ތަހްރީކޭ ތާލިބާނޭ ޕާކިސްތާންގެ ލީޑަރު ނޫރު ވާލީ މަހުސޫދު، ސީއެންއެންއަށް ދިން އިންޓަރވިއު އިންނެވެ.
މި އިންޓަރވިއުގައި މަހުސޫދު ބުނެފައި ވަނީ އޭނާގެ ޖަމާއަތުގެ އަމާޒަކީ އަފްޣާނިސްތާނާއި އިންވެގެންވާ ޕާކިސްތާންގެ ގަބީލާ ސަރަހައްދު މިނިވަން ކުރުމަށް ހަނގުރާމައެއް ކުރުން ކަމަށެވެ. އޭނާ ވަނީ އިންގިލާބޭ މަހުސޫދުގެ ނަމުން މެނިފެސްޓޯއެއްވެސް އެކުލަވާލައި ހާމަ ކޮށްފައެވެ.
ޕާކިސްތާންގެ ގަބީލާ ސަރަހައްދުގެ މީހުން މީގެ ކުރިން ޕާކިސްތާނުން މިނިވަންވާން ބޭނުންވެގެން އެވާހަކަ ދައްކާފައެއް ނުވެއެވެ. ނަމަވެސް ހަލަބޮލި ވަމުންދާ މިޒާމނުގައި މި ޖަމާއަތްތަކުން އާންމުންގެ ވިންދާ ކުޅެލައި މަގުބޫލުކަން ހޯދުމުގެ ގޮތުން މިފަދަ ވާހަކަތައް ފާޅުގައި ތިލަކޮށްލަނީ ކަމުގައި އޭނާ ވިދާޅުވިއެވެ.
ރާނާ ވިދާޅުވިގޮތުގައި ތާލިބާނަށް ހަމްދަރްދީވާނެ އެތައް ބަޔެއް ޕާކިސްތާނުގައި ބޯހިއްލާލާނެ އެވެ. މިހާރު ފެންނަމުން ދަނީ އަފްޣާނިސްތާންގައި ބޮނދައިގެން ތިބި ޓެރަރިސްޓް ޖަމާއަތްތަކުން ކުލަވަރު ބަދަލުކޮށް އެމީހުން މައިދާނަށް ނިކުންނަ މަންޒަރު ކަމަށްވެސް އޭނާ ވިދާޅުވިއެވެ.
ތަހުރީކޭ ތާލިބާނޭ ޕާކިސްތާނުން ވަނީ އަފްޣާން ޕާކިސްތާން ބޯޑާ ސަރަހައްދަށް ޖުލައި މަހު އެކަނިވެސް 15 ހަމަލަ ދީފައެވެ.
ޕާކިސްތާނު ސަރަހައްދުން ތާލިބާނާ ގުޅޭނެ ކަމަށް ބެލެވޭ ޓެރަރިސްޓް ޖަމާއަތްތަކަކީ އަލްގައިދާއާއި އިސްލާމިކް ސްޓޭޓާއި، ޖެއިޝޭ މުޙައްމަދުއާއި ޖަމާއަތުއް ދަޢުވާއެވެ. މިއީ ޕާކިސްތާންގައި މަނާކޮށްފައިވާ ޓެރަރިސްޓް ޖަމާއަތްތަކެވެ. ސަރުކާރުން ފިޔަވަޅު އެޅިނަމަވެސް މިމީހުންގެ ބާރު ކުޑަ ކުރެވިފައެއް ނުވެއެވެ. މިމީހުން މިހާތަނަށް ތިބީ ބޮނދައިގެންނެވެ.
