ޗައިނާއާއެކު ސަރަހައްދީ ދެބަސްވުމެއް އުފެދިފައިވާ ދަނޑިވަޅެއްގައި އިންޑިއާއިން ވަނީ ދެކުނު ޗައިނާ ކަނޑާއި ހުޅަނގު ޕެސިފިކް ސަރަހައްދުގައި އަސްކަރީ ތަމްރީންތައް ބާއްވަން ފަށާފައެވެ. އިންޑިއާގެ އަމާޒަކީ، ދެކުނު އިރުމަތީ އޭޝިއާގައި އިންޑިއާގެ ފައިތިލަ ހަރުލެއްވުމެވެ. އަދި ޗައިނާއަށް އެކަން ދެއްކުމެވެ.
ދެކުނު ޗައިނާ ކަނޑާއި ހުޅަނގު ޕެސިފިކް ކަނޑުގައި އިންޑިއާއިން އެއްފަރާތުގައި ހަތަރު މަނަވަރު ބާއްވައިގެން އަސްކަރީ ތަމްރީންތައް ކުރިއަށް ގެންދާއިރު، އެމެރިކާއާއި ޗައިނާއިން ކުރެ ކޮންމެ ގައުމަކުންވެސް ދަނީ ވަކިވަކިން އެ ސަރަހައްދުގައި އަސްކަރީ ތަމްރީންތައް ބާއްވަމުންނެވެ.
އިންޑިއާގެ އުޅަނދުތައް އަސްކަރީ ތަމްރީނަށް މިސަރަހައްދުގައި ހަރަކާތްތެރިވާނީ ދެ މަސްދުވަސް ވަންދެންނެވެ. މި މުއްދަތުގެ ތެރޭގައި އިންޑިއާއިން ސަރަހައްދުގެ ގައުމުތަކާގުޅިގެން އަސްކަރީ ތަމްރީންތައް ވަކިވަކިންވެސް ބާއްވާނެއެވެ. އޭގެ ތެރޭގައި ސިންގަޕޫރާއި ވިއެޓްނާމާއި އިންޑޮނޭޝިއާއި އަދި އޮސްޓްރޭލިއާއި ފިލިޕީންސް ހިމެނެއެވެ.
އިންޑިއާއިން ދެކުނު ޗައިނާ ކަނޑުގެ ސަރަހައްދަށް ފޮނުވާފައި ވަނީ މިސައިލް ޑެސްޓްރޯޔާއަކާއި، ގައިޑެޑް މިސައިލް ފްރިގޭޓަކާއި، ސެބްމެރިންއާ ދެކޮޅަށް ހަރަކާތްތެރިވާ މަނަވަރަކެވެ. މި ހަތަރު މަނަވަރުތަކުގެ ތެރޭން ތިން މަނަވަރަކީ އިންޑިއާގައި ބަނދެފައިވާ މަނަވަރުތަކެވެ.
ކަނޑުގެ ސަލާމަތާއި ރައްކާތެރިކަމަކީ އިންޑިއާއިން ޚާއްސަ ސަމާލުކަމެއް ދޭ މައުޞޫއެކެވެ. މީގެ އިތުރުން ދެކުނު ޗައިނާ ކަނޑުގެ ސަރަހައްދުގައި މިނިވަންކަމާއެކު ހަރަކާތްތެރި ވެވެން ޖެހޭނެ ކަމަށްވެސް އިންޑިއާއިން ބާރުއަޅައެވެ. އަދި އާސިއާންގެ ގައުމުތަކުން ޗައިނާއާ ގުޅިގެން އެކުލަވާލާ ދެކުނު ޗައިނާ ކަނޑުގައި ހަރަކާތްތެރިވާ ޕްރޮޓޮކޯލްގައި އިންޑިއާއަށް ހުރަސް ނޭގޭގޮތަށް އެ ޑޮކިއުމެންޓް ބައްޓަން ކޮށްފައި އޮތުމުގެ މުހިންމު ކަމާމެދު އިންޑިއާގެ ޚާރިޖީ ވަޒީރު ވަނީ އާސިއާންގެ ޚާރިޖީ ވަޒީރުންގެ ބައްދަލުވުގައި އެދިވަޑައިގެންފައެވެ.
