ކޮވިޑްގެ ހާލަތު ހައްދުން ނެއްޓިޔަ ނުދިނުމަށްޓަކައި، އިންޑިއާގައި ދީނީ އަދި ސަގާފީ އިހުތިފާލުތައް ފާހަގަ ކުރުމުގައި އިންތަކެއް ކަނޑައަޅާފައި ބޭއްވުމަށް މަރުކަޒީ ސަރުކާރުން އަންގައިފިއެވެ. އިންޑިއާގައި ދުވާލަކަށް ހަތަރު ލައްކަ ޕޮޒިޓިވް ކޭސްތައް ރިޕޯޓު ކުރުމަށްފަހު، މިހާރު ދުވާލެއްގެ މައްޗަށް ޕޮޒިޓިވްވާ ނިސްބަތް އުޅެނީ ސާޅީސް ހާހުގައެވެ. އިންޑިއާގެ ހެލްތު މިނިސްޓްރީން ބުނާ ގޮތުގައި އަދިވެސް ކޮވިޑްގެ ހާލަތު އިންޑިއާގައި ހަމައަކަށް އެޅުނީ ކަމަށް ބަލައިގެނެއް ނުވާނެއެވެ.
މިމަސް ތެރޭގައި އިންޑިއާގައި ފެށޭ ފެސްޓިވަލްތައް ނޮވެމްބަރާ ހަމައަށް ދެމިއޮންނާނެއެވެ. އޭގެ ތެރޭގައި، ދީވާލީވެސް ހިމެނޭނެއެވެ. މަރުކަޒީ ސަރުކާރުން ސްޓޭޓް ސަރުކާރުތަކުގައި އެދިފައި ވަނީ އާންމު އެއްވުންތައް ބޭއްވުމާއި އިހުތިފާލުތައް ބޭއްވުން ކޮންޓްރޯލް ކުރުމަށެވެ.
އިންޑިއާގައި ކޮވިޑްގެ ހާލަތު ހައްދުން ނެއްޓިގެން ދިޔައީ ގިނަ އަދަދަކަށް ހިންދީން 13 އަހަރުން އެއްފަހަރަކު ބާއްވާ މުނާސަބާއަކަށް ހަރިދުވާރުގައި ގަންގާ ކޯރިގެ އައްސޭރިފަށަށް އެއްވެ، ގައިގޯޅިވެ އުޅުމުންނެވެ.
އިންޑިއާގައި ކޮވިޑްގެ ދެވަނަ ރާޅެއް ލައިގަތުމާއެކު މަރުކަޒީ ސަރުކާރަށް މީހުންގެ ފާޑު ކިޔުން އަމާޒުވެގެން ދިޔައެވެ.
މިވަގުތު، އިންޑިއާގައި އެންމެ ގިނައިން ކޮވިޑް ރިޕޯޓް ކުރަމުން ދަނީ ކެރެލާއިންނެވެ. ކެރެލާއަކީ އިންޑިއާގައި އޮކްސިޖަނަށް ނުޖެހި ދެވަނަ ރާޅުގައި ކޮވިޑް އެންމެ ރަގަޅަށް މެނޭޖްކުރި ސްޓޭޓެވެ. މިހާރުވެސް ދެވަނައަށް އެންމެ ގިނައިން ކޮވިޑް ކޭސްތައް ރިޕޯޓް ކުރަނީ މަހަރާޝްޓްރާއިންނެވެ.
