ދުނިޔޭގައި ދެވަނައަށް އެންމެ ގިނަ މީހުން ގެއްލުވާލައިފައިވާ ގައުމަކީ ސްރީލަންކާ ކަމަށް އެމްނެސްޓީ އިންޓަރނޭޝަނަލުން ބުނެފިއެވެ. އެމްނެސްޓީން ބުނެފައި ވަނީ ސްރީލަންކާގެ ބަންޑާރަ ނާއިބްގެ އޮފީހުން "ނޭވީ11" ގެ މައްސަލަ ކުރިއަށް ނުގެންދިއުމަށް ނިންމުމަކީ، ގަދަކަމުން ނިޒާމުން ގެއްލުވާލާފައިވާ މީހުންގެ އާއިލާތަކަށް އިންސާފު ލިބުން ބިލާހަކަށް ހެދުމުގެ އަމަލެއް ކަމަށެވެ.
ނޭވީ11 މައްސަލައަކީ ސްރީލަންކާގެ ކަނޑުގެ ސިފައިން އިސްވެ ތިބެގެން ސްރީލަންކާގެ ތަމަޅަ ދަރިކޮޅުގެ 11 ޒުވާނަކު 2008އާއި 2009ގައި ގެއްލުވާލާފައިވާ މަޝްހޫރު މައްސަލައެވެ.
ސްރީލަންކާގެ އަހުލީ ހަނގުރާމައިގައި އިންސާނީ ޙައްގުގެ ޙުރުމަތް ކަނޑާފައިވާ މައްސަލާގައި، އަދުލުއިންސާފު ގާއިމްކޮށް ދިނުމަށް ބައިނަލްއަގްވާމީ މުޖުތަމައިން ސްރީލަންކާއަށް ދަނީ ގޮވާލަމުންނެވެ.
ތަމަޅަ ޒުވާނުން ގެއްލުވާލާފައިވާ މައްސަލާގައި ތުހުމަތުކުރެވިފައިވާ ކުރގެ ނޭވީ ކޮމާންޑަރ ވަސަންތާ ކަރަންނަގޯޑާގެ ޝަރިއަތް ކުރިއަށް ނުގެންދިއުމަށް، ސްރީލަންކާގެ ބަންޑާރަ ނާއިބު ވަނީ ނިންމަވާފައެވެ.
ސްރީލަންކާ ހަނގުރާމައިގައި ގެއްލިފައިވާ ތަމަޅައިންގެ ގިނަ ބަޔަކު ގެއްލުވާލާފައި ވަނީ ސްރީލަންކާގެ ނޭވީންކަމަށް ތުހުމަތު ކުރެވެއެވެ.
2018 އޮގަސްޓްގައި ސްރީލަންކާ ސީއައިޑީން ހިންގާފައިވާ ތަހުގީގެއްގައިވެސް ތަމަޅަ ޒުވާނުން ގެއްލުވާފައިވާ ކަމަށް ތުހުމަތުކޮށްގެން، ލެފްޓިނެންޓް ކޮމާންޑަރ ޗަންދްނަ ޕްރަސާދު ހެރިއެއްޓީ ހައްޔަރުކުރިއެވެ. އޭނާއަކީ ނޭވީ ސަމްޕަތުގެ ނަމުން މަޝްހޫރު، މީހުން ވަގަށް ނެގުމުގެ މާސްޓަރމައިންޑް ކަމަށް ތުހުމަތުކުރެވެއެވެ. އަދި އެދުވަސްވަރު އޭނާ ހައްޔަރުކުރުމާ ދެކޮޅު ހެދުމުން، ޗީފް އޮފް ޑިފެންސް ސްޓާފް އެޑްމިރަލް ރަވިންދްރަ ވިޖެގުނަރަތުނަ ހައްޔަރުކުރުމަށްވެސް ސްރީލަންކާ ކޯޓުން ޙުކުމް ކުރިއެވެ.
