އެމެރިކާއާއި އިންޑިއާއާއި ޔޫކޭއާއި ޖަރުމަނުވިލާތުން ދެކުނު ޗައިނާ ކަނޑުގައި ފުޅާދާއިރާއެއްގެ އަސްކަރީ ތަމްރީންތައް ބޭއްވުމަށް ނިންމުމާގުޅިގެން ޗައިނާއިން ދެކުނު ޗައިނާ ކަނޑުގެ ސަރަހައްދުގެ ބޮޑު ބައެއްގައި ތަމްރީން ބާއްވާނެ ކަމަށް ބުނެފިއެވެ. ޗައިނާއިން ދެކުނު ޗައިނާ ކަނޑުގައި ތަމްރީންތައް ބާއްވާނެކަމަށް ބުނެ ސަރަހައްދެއް ކަނޑައަޅައި އެސަރަހައްދަށް ވަނުމުން ނުރައްކަލާ ކުރިމަތިލާން ޖެހިދާނެ ކަމަށްވެސް ބުނެފައި ވެއެވެ. ޗައިނާއިން ބުނެފައިވާ ގޮތުގައި މި ސަރަހައްދުގައި ދިރޭ ވަޒަން ބޭނުން ކުރެވޭނެއެވެ. އަދި މަތިންދާބޯޓު އުފުލުފާ މަހާ މަނަވަރުތައް ގޮއްވާލުމުގެ ކުޅަދާނަކަން ލިބިފައިވާ، ޗައިނާއިން އުފައްދާފައިވާ މިސައިލްވެސް މި ސަރަހައްދުގައި ޓެސްޓް ކުރާނެ ކަމަށް ބުނެފައި ވެއެވެ.
ޗައިނާއިން ބުނެފައި ވަނީ ބެއިޖިންގއިން ހިންގަން ނިންމާފައިވާ ތަމްރީނުތައް ހުކުރު ދުވަހު ފަށާގޮތަށް އަންގާރަ ދުވަހާ ހަމައަށް ދެމިގެންދާނެއެވެ.
މި ތަމްރީނުތަކަކީ، މިފަހަކަށް އައިސް ޗައިނާ ކައްކާލުމަށް ދުޝްމަނުން ރާވަމުންދާ ތަމްރީނުތަކާ ކުރިމަތިލުމަށް ބާއްވާ ތަމްރީނުތަކެއްކަމަށްވެސް ޗައިނާގެ ގްލޯބަލް ޓައިމްސް ނޫހުން ބުނެފައި ވެއެވެ.
ޗައިނާއިން މި ތަމްރީނާ ބެހޭ ތަފްސީލީ މަޢުލޫމާތު ދީފައެއް ނުވެއެވެ. ނަމަވެސް ތައިވާންގެ ނޫސް އެޖެންސީއަކުން ބުނެފައި ވަނީ މިތަމްރީނަކީ، ބެލެސްޓިކް މިސައިލް ބޭނުންކޮށްގެން ބާއްވާ ތަމްރީނުތަކެއް ކަމަށެވެ. މިދިޔަ އަހަރުވެސް މިފަދަ ތަމްރީނެއް ޗައިނާއިން ބޭއްވިކަމަށް ބުނެފައި ވެއެވެ.
އެމެރިކާގެ މީޑިއާއިންވެސް މިދޔަ އަހަރުގެ އޮގަސްޓް މަހުގެ ފަހުކޮޅު ބާއްވާފައިވާ ތަމްރީނުގެ ވާހަކަ ހާމަކޮށްފައި ވެއެވެ. އޭގައިވެސް މަތިންދާބޯޓު އުފުލާ މަނަވަރު ގޮއްވާލާ މިސައިލް ޓެސްޓް ކުރިކަމަށް ރިޕޯޓް ކޮށްފައި ވެއެވެ.
ޗައިނާގެ ދެވަނަ މަތިންދާ ބޯޓު އުފުލާ މަނަވަރު ބޭނުންކޮށްގެން ދެކުނު ޗައިނާ ކަނޑުގައި މިދިޔަ ހަފްތާގައިވެސް ޗައިނާއިން ތަމްރީނުތައް ބޭއްވިކަމަށް އެމެރިކާގެ ނޫސްތަކުން ރިޕޯޓުކުރެއެވެ.
ޗައިނާ މުހައްލިލުން ބުނާ ގޮތުގައި މި ތަމްރީނު ތަކަކީ، ޗައިނާގެ ކަނޑުގެ ސަރަހައްދަށް އެއްވެސް ބާރަކުން ވަދެފާނެތީއާއި އަދި އެފަދަ ނުރައްކަލަކާ ކުރިމަތިލުމަށްޓަކައި ޗައިނާގެ އަސްކަރީ ކުޅަދާނަކަން އިތުރު ކުރުމަށް ބާއްވާ ތަމްރީނުތަކެކެވެ.
