ކޮންމެ މީހަކުވެސް ހަށިގަނޑު ރީތިކޮށް ބަހައްޓަން ބޭނުންވެއެވެ. ޚާއްސަކޮށް ހަންގަނޑު ރީތިކޮށް ތާޒާކޮށް ބަހައްޓަން ބޭނުންވެއެވެ. ނަމަވެސް އުމުރުން ދުވަސް ވަމުންދާވަރަކަށް ބައެއް މީހުންގެ މޫނާއި އަތާއި ފައި އަދި ހަށިގަނޑުގެ އެހެން ހިސާބު ތަކުގައިވެސް ލައް ޖަހައެވެ. އިނގިރޭސިން މި ލައްތަކަށް ކިޔަނީ "އޭޖް ސްޕޮޓްސް" އެވެ. މި ލައްތައް ބައެއްފަހަރު ކަޅު ކުލައިގައި ނުވަތަ މުށި ކުލައިގައި ހުރެއެވެ. މިކަހަލަ ލައްތައް ބޮޑަށް ފާޅުވަނީ ކުލަ އަލި މީހުންގެ ގައިންނެވެ.
މިއިން ބައެއް ލައްތައް ވަރަށް ކުލަ ގަދަކޮށްވެސް ފާޅުވެއެވެ. އަނެއްބައި ލައްތަކުގެ ވަށައިގެން ކަޅުކޮށް ހުރެއެވެ.
މިގޮތަށް ގައިގައި ހުންނަ ލައްތައް ފިލުވުމަށްޓަކައި ގިނަ ފަރާތްތަކުން އަގުބޮޑު ތަފާތު ބޭސް ބޭނުން ކުރެއެވެ. އެހެންނަމަވެސް އަޅުގަނޑުމެންގެ ގޭގެ ބަދިގެއިން ފަސޭހައިން ލިބެންހުންނަ ދެ ބާވަތަކުން މި ލައްތައް މަދު ކުރެވިދާނެއެވެ. ހަމުގެ ކުލަ އަލި ކުރެވިދާނެއެވެ. އެއިން އެކައްޗަކީ ކެއްކުމަށް އެންމެ ގިނައިން ބޭނުންކުރާ ފިޔައެވެ. ދެވަނަ ބާވަތަކީ އެޕަލް ސިޑާ ވިނިގާ އެވެ.
ފިޔައިގެ ދިޔައިން ލައްތަކާއި ލަކުނުތައް ފިލުވުމަށް އެހީތެރިވެދެއެވެ. މަރުވެފައިވާ ހަމުގެ ފަށަލައަށް އެޕަލް ސިޑާ ވިނިގާއިން ދިރުން ގެނެސްދެއެވެ.
މި ދެބާވަތް ބޭނުނުންކޮށްގެން ލަކުނާއި ލައް ފިލުވުމަށް ހަދާ ޖޫސް ތައްޔާރުކުރާނެ ގޮތަކީ، އެންމެ ފުރަތަމަ އާދައިގެ ހެޔޮވަރު ފިޔައެއް ސާފުކޮށްލުމަށްފަހު މިކްސްޗަރ އިން ގިރާލާނީއެވެ. ދެން ފިޔާޖޫސްގެ ތެރެއަށް އެޕަލް ސިޑާ ވިނިގާ ސަމުސަލެއް އަޅާނީއެވެ. އެއަށްފަހު ކަފަކޮޅެއް މި ދިޔައިން ތެއްމާލުމަށްފަހު ލައްތަކާއި ލަކުނުތަކުގައި އުނގުޅާށެވެ.
އާދަވެގެން ކޮންމެ ދުވަހަކު މިގޮތަށް މި ދިޔަ ލަކުނުތަކާއި ލައް ތަކުގައި އުނގުޅަން ފެށުމުން 3 ހަފުތާތެރޭ ލައްތަކާއި ލަކުނުތައް މަދުވެ ހަންގަޑު ސާފު ވާނެއެވެ. އަދި ހަންގަޑަށް ތާޒާކަން ލިބި ކުލަ އަލިވާނެއެވެ.
މައުލޫމާތު: ޓިޕްސް އެންޑް ޓްރިކްސް
