މޯލްޑިވިއަން އެޑިޔުކޭޝަނަލް އެންޑް ކަލްޗަރަލް ސެންޓަރ (އެމް.އީ.ސީ.ސީ)، ސޯސަންވިލާ، ގައި ކިޔަވާ ދަރިވަރުންގެ ތެރެއިން ދިވެހި ބަހުން ވާހަކަ ދެއްކުމާއި، ލިޔުމުގައި އިތުރު އެހީތެރިކަން ބޭނުންވާ ދަރިވަރުންގެ ފެންވަރު މަތި ކުރުމުގެ ގޮތުން އެ ދަރިވަރުންނަށް އަމާޒުކޮށްގެން ޚާއްސަ ކްލާސްތަކެއް ސޯސަންވިލާގައި ނަގަން ފަށައިފިއެވެ.
"ކޮންމެ ކުއްޖަކީ ލިޔަން ކިޔަން ދަންނަ ކުއްޖެއް" މި ނަމުގައި ސޯސަންވިލާގައި ފެށި މި ޕްރޮގްރާމް ކުރިޔަށް ގެންދަނީ ތިން ގްރޫޕަކަށް ބަހާލައިގެން، ދަރިވަރުން ދިވެހި ބަހަށް ޝައުގުވެރިވާ ފަދަ ޙަރަކާތް ތަކާއެކުގައެވެ.
މިވަގުތު ޒޫމް މެދުވެރިކޮށް ކުރިޔަށްދާ މި ކްލާސްތައް ބާއްވަނީ ކޮންމެ ހަފްތާއެއްގެ ހޯމަ އަދި ބުރާސްފަތި ދުވަހުއެވެ. ކްލާސްތައް ހަފްތާއަކު ދެ ދުވަހު ކުރިޔަށްދާއިރު، ދަރިވަރުންނަށް އަންނަ ކުރިއެރުންތައް ކޮންމެ މަހަކު އެއްފަހަރު ސޯސަންވިލާގެ މުދައްރިސުން ބެލެނިވެރިންނާ ޙިއްސާ ކުރަމުންވެސް ދާނެއެވެ.
ސްރީލަންކާގައި ދިރިއުޅޭ ދިވެހި ކިޔަވާ ކުދިންނަށް ޚާއްސަކޮށްގެން ދިވެހި ސަރުކާރުން ލަންކާގައި ހިންގަމުން އަންނަ އެމް.އީ.ސީ.ސީ، ސޯސަންވިލާގައި ކިޔަވައިދެނީ ދިވެހި، އިސްލާމް އަދި ޤުރުއާން މާއްދާއެވެ.
