ދެކުނު ޗައިނާ ކަނޑުގައި ޗައިނާއިން އުދުވާނީ އަމަލުތައް ހިންގަމުންދިއުމާ ގުޅިގެން ފިލިޕީންސްއިން އެންމެ ގިނަ ޑިޕްލޮމެޓިކް ޝަކުވާތަކެއް ކޮށްފައި ވަނީ މިއަހަރުގެ ތެރޭގައެވެ. ފާއިތުވި ފަސް އަހަރާ އަޅާ ބަލާއިރު މިއަހަރު ކޮށްފައިވާ ޝަކުވާތައް ވަރަށް ބޮޑަށް އިތުރުވެފައިވާ ކަމަށް ފިލިޕީންސް މީޑިއާ ރިޕޯޓް ކުރެއެވެ.
ރޭޑިއޯ ފްރީ އޭޝިއާއިން ބުނާ ގޮތުގައި މިއިން ދައްކައި ދެނީ ފިލިޕީންސްއިން ޗައިނާއާ މެދު ހަރުކަށިވާން ފެށުމެވެ. ނަމަވެސް ފިލިޕީންސްގެ ރައީސަކީ ޗައިނާއިން އިންވެސްޓްމެންޓްތައް ހޯދުމުގައި ޗައިނާއަށް ދީލާލާ ވެރިއެކެވެ.
ފިލިޕީންސް ނިއުސް އެޖެންސީން ރިޕޯޓް ކުރިގޮތުގައި މި ހިނގާ އަހަރުގެ ތެރޭގައި މެނީލާއިން ވަނީ ޑިޕްލޮމެޓިކް ނޯޓާއި ނޯޓް ވަރބަލް މެދުވެރިކޮށް ޗައިނާއަށް 153 ޝަކުވާ ހުށަހަޅާފައެވެ.
މި ޝަކުވާތަކަކީ ޗައިނާއިން ދެކުނު ޗައިނާ ކަނޑުގައި ފިލިޕީންސްގެ އަމިއްލަ ސަރަހައްދުގައި އެގައުމުގެ ސިފައިން ޕެޓްރޯލް ކުރާއިރު ޗައިނާ ސިފައިން ދުއްތުރާ ކުރާ މައްސަލައިގެ ޝަކުވާތަކެވެ.
މިއަހަރުގެ ތެރޭގައި ފުރަތަމަ ފަހަރަށް ޗައިނާއަށް ފިލިޕީންސްއިން ޝަކުވާ ކުރީ މާޗް މަހުގައެވެ. އެއީ ޗައިނާގެ އެތައް ސަތޭކަ މަސްބޯޓެއް ފިލިޕީންގެ އިގްތިސާދީ ސަރަހައްދުގައި އޮންނަ ޖަޒީރާއަކަށް ވަދެ އެތަން ހިސާރު ކުރުމގެ ސަބަބުންނެވެ.
