އިންޑިއާއިން ދިހަ އަހަރު ތެރޭ ސޮއިކުރާ ފުރަތަމަ ފްރީ ޓްރޭޑް އެއްބަސްވުމުގައި ސޮއިކުރުމަށް ދަނީ ތައްޔާރު ވަމުންނެވެ. ޔޫއޭއީއާއެކު އިންޑިއާއިން ސޮއިކުރާ ފްރީ ޓްރޭޑް އެއްބަސްވުމުގައި ހިމެނޭނީ ޖަވާހިރާގައި ގަހަނާއާއި ފޭރާމާއި ފޮއްޗާއި އިންޖިނިއަރިންގ ސާމާނާއި ދަނގަނޑުގެ ބާވަތްތަކުން ޑިއުޓީ ކަނޑާލުމަށެވެ. ޖުމުލަ ގޮތެއްގައި ބުރަ މަސައްކަތުން އުފައްދާ ބާވަތްތައް ޑިއުޓީން އިސްތިސްނާ ކުރުމަށް އެއްބަސްވުން ހިމެނެއެވެ.
ޔޫއޭއީއަކީ އިންޑިއާއިން މުދާ އެންމެ ގިނައިން އެކސްޕޯޓް ކުރާ ތިންވަނަ މަންޒިލެވެ.
މި އެއްބަސްވުމުގައި އިންޑިއާއިން އެންމެ ބޮޑަށް ބާރުއަޅާ ކަމަކީ މުދާ އުފައްދާ ގައުމު، ކަންޓްރީ އޮފް އޮރިޖިން ކަށަވަރުކުރުމާ ބެހޭ ކަންކަމެވެ. ކަންޓްރީ އޮފް އޮރިޖިން އޮޅުވާލައިގެން ޗައިނާގެ ނަކަލް މުދަލަށް އިންޑިއާގެ މުދަލުގެ ނަމުގައި މިފަދަ ފައިދާއެއް ނެގުމަށް ފުރުސަތު ނުދިނުމަށެވެ.
އިންޑިއާއިން އުފައްދައި އެކްސްޕޯޓް ކުރާ މުދާ ޔޫއޭއީގައި އެއްކޮށްފުރިހަމަ ކުރާނަމަ، އޭގެ އަގަށް 35 ޕަސެންޓް އިތުރު ކުރުން ހުއްދަ ކުރުންވެސް މީގައި ހިމެނޭނެއެވެ.
މިއެއްބަސްވުމަށް ދީފައިވާ ރަސްމީ ނަމަކީ ކޮމްޕްރެހެންސިވް އިކޮނޮމިކް ޕަރޓްނާޝިޕް އެގްރީމެންޓެވެ. ނިއުދިއްލީގައި މި އެއްބަސްވުމުގެ މަޝްވަރާތައް ފަށާފައި ވަނީ ސެޕްޓެންބަރު 23 ގައެވެ. މި މަޝްވަރާތައް މިއަހަރު ޑިސެންބަރަށް ނިންމުމަށްފަހު އަންނަ އަހަރުގެ ކުރީކޮޅު އެއްބަސްވުމުގައި ސޮއިކުރުމަށް ހަމަޖެހިފައި ވެއެވެ.
ޔޫއޭއީއަށް އެތެރެކުރާ 87 ޕަސެންޓް މުދަލަށް ފަސް ޕަސެންޓްގެ ރޭޓުން މިހާރު ޑިއުޓީ ނަގައެވެ. އަދި 11 ޕަސެންޓް މުދަލަށް ޑިއުޓީއެއް ނޯވެއެވެ.
އިންޑިއާއިން ޔޫއޭއީއަށް 16 ބިލިއަން ޑޮލަރުގެ މުދާ އެކްސްޕޯޓް ކުރެއެވެ. މި އިން ބައެއް ބާވަތަށް 5 ޕަސެންޓާއި 11 ޕަސެންޓުން ޑިއުޓީ ނަގައެވެ.
