ޗައިނާގެ މުވާސަލާތީ ކުންފުނިން އެމެރިކާގައި މުވާސަލާތީ ޚިދުމަތް ދިނުން ހުއްޓާލުމަށް އެމެރިކާ ސަރުކާރުން އަންގައިފިއެވެ. ޗައިނާ ޓެލެކޮމް އިން 60 ދުވަސްތެރޭގައި އެމެރިކާގައި ޚިދުމަތް ދިނުން ހުއްޓާލަން ޖެހޭނެއެވެ. އެމެރިކާ ސަރުކާރުން ބުނާ ގޮތުގައި ޗައިނާ ޓެލެކޮމްއަކީ ޗައިނާ ކޮމިއުނިސްޓް ޕާޓީގެ ނުފޫޒު އޮންނަ ކުންފުންޏެކެވެ. ޗައިނާ ސަރުކާރުގެ ބޭނުމަށް ޗައިނާ ޓެލެކޮމްއަށް އެމެރިކާގެ މުވާސަލާތުގެ ތެރެއަށް ވަދެގަނެ، އެ މުވާސަލާތުގެ މަޢުލޫމާތު އެއްކޮށް، ބޭނުން ދިމަދިމާއަށް ފޮނުވުމުގެ ބާރު ލިބިގެންވެއެވެ.
ޗައިނާ ޓެލެކޮމްއަކީ އެމެރިކާގައި މަތީފެންވަރުގެ މުވާސަލާތީ ޚިދުމަތް ދެމުންދާ ކުންފުންޏެކެވެ. މިކުންފުނި ޚިދުމަތުގައި އެމެރިކާގައި އުޅޭތާ 20 އަހަރު ވެއްޖެއެވެ.
މީގެ ކުރިން ގައުމީ ސަލާމަތީ ސަބަބުތަކަށްޓަކައި އެމެރިކާއިން ވަނީ ޗައިނާގެ ވާވޭއާއި ޒެޑްޓީއީ ކުންފުންޏާ ދެކޮޅަށް ފިޔަވަޅު އަޅާފައެވެ.
އަދި މުސްތަގްބަލުގައި ޗައިނާގެ މުވާސަލާތީ އިތުރު ދެކުންފުންޏަކާ ދެކޮޅަށް ފިޔަވަޅު އެޅުމަށްވެސް ނިންމާފައި ވެއެވެ. އެއީ ޗައިނާ ޔުނިކޮން އެމެރިކާސްއާއި ޕެސިފިކް ނެޓްވަރކްސްއެވެ.
