ބްރަޒީލްގައި ކޯވިޑް19ގެ ފިޔަވަޅުތަކުގައި ރައީސް އިހުމާލުވެފައިވާ ކަމަށާއި ގިނަ ބައެއްގެ ފުރާނަ ގެއްލިގެން ގޮސްފައި ވަނީ ރައީސްގެ ދޯދިޔާކަމުން ކަމުންކަމަށް ބްރަޒީލްގެ ސެނެޓްގެ ކޮމިޓީއަކުން ނިންމައިފިއެވެ.
ހަ މަސް ވަންދެން ތަހުގީގު ކުރުމަށްފަހު ކޮމިޓީން ނިންމާފައި ވަނީ ބްރަޒީލްގައި ކޮވިޑް ޖެހިގެން މަރުވެފައިވާ ހަ ލައްކަ މީހުންގެ މަރަށް ރައީސް ޒިންމާވާން ޖެހޭނެކަމަށެވެ. އަދި މާބޮޑަށް ކަންކަން ދަންނަ މީހަކަށް ވެގެން ރައްޔިތުންނަށް އޮޅުވާލުމުން، ގިނަ އަދަދަކަށް މީހުން މަރުވެފައިވާ ކަމަށްވެސް ބުނެފައި ވެއެވެ. އަދި އިންސާނިއްޔަތާ ދެކޮޅު ޖަރީމާތައްވެސް ރައީސް ޖެއިރް ބޮލްސްނާރޯ ހިންގަވާފައިވާ ކަމަށް ރިޕޯޓްގައި ބުނެފައި ވެއެވެ. މި ރިޕޯޓް ފާސްކޮށްފައި ވަނީ 4 ވޯޓު 3 ވޯޓުންނެވެ.
ބްރަޒީލްގެ ރައިސަކީ ކުރިން ވަރަށް މަގްބޫލު ބޭފުޅެކެވެ. ނަމަވެސް މިހާރު އޭނާގެ މަގްބޫލުކަން ވަނީ ގެއްލިފައެވެ.
ކޮމިޓީގެ ރައީސް ސެނެޓަރ އުމަރު އަޒީޒު ވިދާޅުވީ ބޮލްސްނާރޯގެ ޝަރީއަތް ކުރުމަށް ޕްރޮސެކިއުޓަރ ޖެނެރަލްއަށް މި ރިޕޯޓް ފޮނުއްވާނެ ކަމަށެވެ.
ބްރަޒިލްގެ ޕްރޮސެކިއުޓަރ ޖެނެރަލްއަކީ ރައީސް އައްޔަން ކުރައްވާފައިވާ ރައީސަށް ތާއީދުކުރައްވާ ބޭފުޅެކެވެ.
ބޮލްސްނާރޯއަށް ތުހުމަތު ކުރެވޭ އިންސާނިއްޔަތާ ދެކޮޅު ޖަރީމާތައް ބެލެވޭނީ އިންޓަރނޭޝަނަލް ކްރިމިނަލް ކޯޓުންނެވެ.
