ޗައިނާގައި ބާރަށް، ދޫނި ރޯގާ އިންސާނުންނަށް ޖެހެމުންދާ މައްސަލަ އަވަހަށް ބަލައި ދިނުމަށް އެދި ދުނިޔޭގެ ސިއްހަތު ޖަމުއިއްޔާއިން ޗައިނާއަށް ގޮވާލައިފިއެވެ. ތަޖުރިބާކާރުން ބުނާ ގޮތުގައި މިހާރު އިންސާނުންނަށް ޖެހެމުންދާ ދޫނި ރޯގާގެ ވައްތަރަކީ ކުރިން ލައިގަތް ވައްތަރަށް ވުރެން ނުރައްކާތެރި ބާވަތެކެވެ. މިހާރު ޖެހެމުންދާ ދޫނި ރޯގާ ވަނީ ޗައިނާގެ އެތައް ބަޔަކަށް ޖެހިފައެވެ.
ޗައިނާއިން ވަނީ 2021 ގައި ދޫނި ރޯގާގެ އެޗް5އެން6 ވައްތަރު 21 މީހަކަށް ޖެހިފައިވާ ކަމަށް ދުނިޔޭގެ ސިއްހަތު ޖަމުއިއްޔާއަށް ރިޕޯޓް ކޮށްފައެވެ. މިދިޔަ ފަސް އަހަރު ތެރޭ ރިޕޯޓް ކޮށްފައި ވަނީ މި ވައްތަރުގެ ދޫނި ރޯގާގެ އެންމެ ފަސް ކޭހެވެ.
މިއީ ސީރިއަސް ވައްތަރެއް ކަމަށާއި މި ވައްތަރުގެ ދޫނި ރޯގާ ޖެހުނު މީހުންގެ ތެރޭން ހަ މީހަކު މަރުވެފައިވާ ކަމަށްވެސް ރިޕޯޓްކޮށްފައި ވެއެވެ.
ޑަބްލިއުއެޗްއޯއިން ބުނާ ގޮތުގައި އިންސާނުންގެ ފުށުން އިންސާނުންނަށް މި ވައްތަރުގެ ރޯގާ ޖެހިފައިވާ ކަމަށް އަދި ނުދައްކައެވެ. މިހާތަނަށް ރިޕޯޓްކޮށްފައިވާ ކޭސްތަކަކީ ދޫނި ގެންގުޅޭ ތަންތަނުން މީހުންގެ ގަޔަށް އަރައިގެން ރިޕޯޓް ކޮށްފައިވާ ކޭސްތަކެވެ.
ޗައިނާއަކީ އެންމެ ގިނައިން އަސްދޫނި ގެންގުޅޭ ގައުމެވެ. އަސްދޫންޏަކީ ދޫނި ރޯގާގެ ވައިރަސް އުފުލާ ބާވަތެކެވެ.
