ޗައިނާއިން ވަނީ ޗައިނާގެ އެއްގަމު ސަރަހައްދާ ބެހޭ އައު ގާނޫނެއް ފާސްކޮށްފައެވެ. މިގާނޫނަށް އަމަލުކުރަން ފަށާނީ ޖެނުއަރީ 1ން ފެށިގެންނެވެ. މިގާނޫނުގެ މަގްސަދަކީ ޗައިނާއާއެކު ސަރަހައްދުގެ މައްސަލަ އުޅޭ މައި ގައުމުކަމަށްވާ އިންޑިއާއާއެކު ބާއްވާ މަޝްވަރާތައް އުދަގޫ ކުރުން ކަމަށް ނިއުދިއްލީ ދެކެއެވެ.
ޗައިނާއަކީ 14 ގައުމަކާއެކު 22100 ކިލޯމީޓަރުގެ ދިގު ބޯޑަރެއް ޙިއްސާ ކުރާ ގައުމެކެވެ. ޗައިނާއިން އިންޑިއާއާއެކު 3488 ކިލޯމީޓަރުގެ ބޯޑަރެއް ޙިއްސާ ކުރެއެވެ.
މުހައްލިލުން ބުނާ ގޮތުގައި ގިނަ ބަސްތަކެއް ހިމަނައިގެން އެކުލަވާލާފައިވާ މި ގާނޫނަކީ އިންޑިއާއާއެކު ޗައިނާއިން ބާއްވާ މަޝްވަރާތައް އިތުރަށް އުދަގޫކޮށް އަޖުމަ ބެލުމުގެ ގޮތުން ފާސްކޮށްފައިވާ ގާނޫނެކެވެ.
އަވަށްޓެރިންނާއެކު ރަހުމަތްތެރި ގާތް ގުޅުމެއް ބާއްވަން ބާރުއަޅާ ގާނޫނުގައި ސަރަހައްދު ބެލެހެއްޓުމުގެ ދިފާއު ވަރުގަދަ ކުރުމަށާއި ސަރަހައްދުގައި މީހުން ދިރިއުޅޭ އަވަށްތަކުގެ ހާލަތު ރަގަޅު ކުރުމާއި އެމީހުންގެ އިގްތިސާދީ ކަންކަން ރަގަޅު ކުރުމަށް ބާރުއަޅާފައި ވެއެވެ.
އިންޑިއާއިން ޗައިނާއާއެކު އެއް އަހަރަށް ވުރެން ދިގު މުއްދަތަކަށް ދެމިގެންދާ ސަރަހައްދީ ދެބަސްވުމެއްގައި މަޝްވަރާތައް ބާއްވާފައި ވެއެވެ. ލަދާކްގައި ބައެއް ސަރަހައްދުތަކުގައި ޗައިނާއާއި އިންޑިއާއިން ސިފައިން ދުރަށް ޖައްސާފައިވީ ނަމަވެސް އެކި ފެންވަރުގައި ބާއްވާފައިވާ މަޝްވަރާތަކަށްކުރިއެރުމެއް ލިބިފައެއް ނުވެއެވެ.
މުހައްލިލުން ބުނާ ގޮތުގައި މި ގާނޫނުގެ މަގްސަދަކީ ޗައިނާގެ މަޝްވަރާ ކުރުމުގެ ފުރުސަތު ވަރުގަދަ ކުރުމެވެ.
އިންޑިއާއން ވަނީ ޗައިނާއިން ފާސްކުރި ސަރަހައްދާ ބެހޭ ގާނޫނަށް ފާޑުކިޔާފައެވެ. އަދި މި ގާނޫނު ފާސްކުރިނަމަވެސް އިންޑިއާއާއެކު ޗައިނާއިން އެއްބަސްވެފައިވާ ސަރަހައްދާ ބެހޭ ހަތަރު މުއާހަދާ އެގޮތަށް ދެމިގެންދާނެ ކަމަށާއި އެއަށް ބަދަލެއް ނާންނާނެކަމަށް އިންޑިއާގެ އެކްސްޓާނަލް އެފެއާޒް މިނިސްޓްރީގެ ތަރުޖަމާން ވިދާޅުވިއެވެ.
ކޯވިޑް19ގެ ތެރޭގައި މެއި 2020ގައި އިންޑިއާއަށް ޗައިނާއިން ދިން އުދުވާނީ ހަމަލާގައި އިންޑިއާގެ ވިއްސަކަށް ސިފައިން މަރުވިއެވެ. އަދި ޗައިނާ ފަޅިން ސިފައިންގެ 51 މީހަކު މަރުވިއެވެ.
