ޕާކިސްތާންގެ ބޮޑު ވަޒީރު އިމްރާން ޚާނަށް ހަމަ ނިދި ލިބިވަޑައި ނުގަންނަވާ ރޭތަކެއް ވޭތިކުރަން ޖެހިވަޑައިގެންފައި ވެއެވެ. އޮމާންކަމާއެކު ކޮރަޕްޝަނާ ދެކޮޅަށް ތެދުވެރި ވެރިކަމެއް ކުރެއްވުމަށް އިމްރާން ޚާން މަސައްކަތް ކުރެއްވިއެވެ. ކޮވިޑް ލައިގަތެވެ. އިގްތިސާދު ހީނަރުކޮށްލިއެވެ. ހަމައެއާއެކު ސިފައިން ބޭނުންވީ އެމީހުންގެ މުސާރަ ބޮޑުކޮށްލާށެވެ.
އިމްރާން ޚާން ވެރިކަމަށް ގެނައީ ސިފައިންނެވެ. ވަކިން ޚާއްސަކޮށް ޕާކިސްތާންގެ ސިފައިންގެ ޖާސޫސީ އިދާރާ އައިއެސްއައި އިންނެވެ. އަދި އެއަށްވުރެންވެސް ސާފުކޮށް ބުނާނަމަ، އައިއެސްއައިގެ ވެރިޔާ ލެފްޓިނެންޓް ޖެނެރަލް ފާއިޒް ހަމީދުގެ މަސައްކަތުންނެވެ.
އިމްރާން ޚާނަށް އެތެރޭގެ ދާޚިލީ މައްސަލަތަކަކާ ކުރިމަތި ލައްވަން ޖެހިވަޑައިގެންފައި ވެއެވެ. އިގްތިސާދީ މައްސަލަތަކަކާ ކުރިމަތި ލައްވަން ޖެހިވަޑައިގެންފައި ވެއެވެ.
ޓެރަރިޒަމަށް ކުރާ ހޭދައަށް ޕާކިސްތާނުން އެދެވޭ ފިޔަވަޅުތަކެއް ނައަޅާކަމަށް ބުނެ އިންޓަރނޭޝަނަލް ފައިނޭންޝަލް އެކްޝަން ޓާސްކްފޯސް އެފްއޭޓީއެފްއިން ޕާކިސްތާން ގްރޭ ލިސްޓަށް ލާފައި ވެއެވެ. މި ލިސްޓުން އުނިކުރާނެ ކަމަށް ހީކޮށްގެން އިމްރާން ޚާން ބުރަކޮށް މަސައްކަތްތަކެއް ކުރެއްވިއެވެ. އެކަމަކު އެންމެ ފަހު ބައްދަލުވުމުގައި އަދިވެސް ޕާކިސްތާން ގްރޭ ލިސްޓްގައި ބާއްވަން ވަނީ ނިންމާފައެވެ.
އޭގެ ކުރިން ޕާކިސްތާނުން މަސައްކަތް ކުރީ ބަޖެޓްގެ ދަރަނި ކުޑަ ކުރުމަށް އައިއެމްއިން ދޭން އެއްބަސްވެފައިވާ ފައިސާ ބަޖެޓަށް ހޯދާށެވެ. އެކަން ކާޟިޔާބު ނުވުމުން ޕާކިސްތާންގެ ބޮޑު ވަޒީރުގެ މާލީ މުސްތަޝާރު ޝައުކަތު ތާރީން ވޮޝިންޓަނުން އެނބުރި ވަޑައިގަތީ ހުސްއަތާއެވެ.
ހަމަ އެހަފްތާގައި އިމްރާން ވަޑައިގަތީ ބަޖެޓް ސަޕޯޓަށް ފައިސާ ހޯއްދެވުމަށް ސައޫދީ އަރަބިއްޔާއަށެވެ.
އޭގެ ކުރީ ހަފްތާއަކީވެސް އިމްރާން ޚާނަށް އެހާމެ ހަލަބޮލި ހަފްތާއެކެވެ. ސިފައިންގެ ވެރިޔާ ޖެނެރަލް ގަމަރު ބާޖްވާ ބޭނުންވީ އައިއެސްއައިގެ ރައީސް އެހެން މަގާމަކަށް ބަދަލުކޮށްލާށެވެ. އާންމުކޮށް ޝަރަފްވެރި ކަމާއެކު ސިފައިންގެ އެދުމަކަށް ސިފައިން އެދޭ މީހަކު ބޮޑު ވަޒީރު އައްޔަން ކުރާ މިމަގާމަށް މީހަކު އައްޔަން ކުރުން ވެގެން ދިޔައީ ސިފައިންގެ އިސް ޖެނެރަލުންނާއި ބޮޑު ވަޒީރާ ދެމެދުގެ ބަނޑު މުސާރައަށް ބެއްދުމުގެ މުބާރާތަކަށެވެ. އެންމެ ފަހުން ބޮޑު ވަޒީރު ޚާނަށް މަޖުބުރުވެ ވަޑައިގަތީ ސިފައިން ބޭނުންވި ގޮތަށް ދީލައި ލައްވާށެވެ.
ޚާން ބޭނުންފުޅުވީ އޭނާއަށް އައު ދައުރެއް ކަށަވަރު ކުރެއްވުމުގެ ގޮތުން އޭނާ މަގާމަށް ގެނައުމުގައި އިސް ދައުރެއް އަދާކުރި އައިއެސްއައި ގެ ވެރިޔާ ހަމައެ މަގާމުގައި އެގޮތަށް ދެމި ހުންނާށެވެ.
މި ހަލަބޮލި ހަފްތާގެ ކުރިން ޚާންގެ ސަރުކާރަށް ދިމާވި އެންމެ ބޮޑު ގޮން ޖެހުމަކީ، މަރުވި ޗައިނާގެ އިންޖިނޭރުންގެ މަރުގެ ދިޔައަށް ޗައިނާއިން އެތައް މިލިއަން ޑޮލަރު ޕާކިސްތާނުން އެދުމުންނެވެ. ޕާކިސްތާނަކީ ޗައިނާއަށް ބޮޑަށް ދަރާފައިވާ ގައުމެކެވެ.
ޗައިނާއަށް ދަރާފައިވާ ދަރަނި ދައްކަން ޖެހެއެވެ. އެކަމަކު ޕާކިސްތާނުގައި ޗައިނާއިން ހިންގާ ސީޕެކްގެ މަޝްރޫއުތައް ހިނގަމުން ދަނީ ފިނިހަކައިގެ ދުވެލީގައެވެ. ޗައިނާއިން އިމްލާ ކުރާ ޝަރުތުތަކާއެކުގައެވެ.
މި ހުރިހައި މުސީބާތަކާއެކު ޕާކިސްތާން ސިފައިން އިމްރާން ޚާނާ ކުރިމަތި ކުރީ ހައްދުފަހަނައަޅާފައިވާ އިސްލާމީ ބައިގަނޑެއްގެ ފިއްތުމާއެވެ.
ޕާކިސްތާންގެ ތަޙްރީކޭ ލައްބައިކަ ޔާރަސޫލުﷲ ޕާޓީއަކީ ބުރޭލްވީ އަގީދާގެ އިސްލާމީ ޚިޔާލުގެ ޕާޓީއެކެވެ. މިމީހުން މަގުތަކަށް ނިކުންނާނީ ސިފައިންގެ އިސްވެރިންގެ އިޝާރާތަށެވެ. އަދި މުޒާހަރާތައް ނިންމައި މަގުތައް ހުޅުވާލަދޭނީވެސް ސިފައިންގެ އިޝާރާތަށެވެ.
ޕާކިސްތާން ސިފައިންނާ އިމްރާން ޚާނާ ދެމެދު އެއްވެސް ވަރެއްގެ އިތުބާރެއް އަދި އިޙުތިރާމެއް ނެތްކަން ދޭހަ ވަނީ، ތަހްރީކޭ ލައްބައިކަ ޕާޓީން މިހާރު މަގުތަކަށް ނުކުމެ އުފައްދަމުންދާ ހައިޖާނުންނެވެ.
ޚާންގެ ސަރުކާރަށް ވަނީ ތަހްރޫކޭ ލައްބައިކަ ކުރިމަތީ ދޫދެއްވުމަށް މަޖުބޫރުވެފައެވެ. ހަޅުތާލް ފިނިކުރުމަށް އެމީހުންގެ ޝަރުތުތަކަށް ސަރުކާރުން ދޫދޭން އޮތްކަމަށް މިހާރު ވަނީ އިއުލާން ކޮށްފައެވެ. ސަރުކާރުގެ ފަރާތުން ތަހްރީކޭ ލައްބައިކައާ ވާހަކަ ދައްކާ ޓީމުގައި ހިމެނެނީ ފޮރިން މިނިސްޓަރާއި ޕާލަމެންޓްގެ ރައީސެވެ.
ހީނަރުވެފައިވާ އިގްތިސާދަށް ތަހްރީކޭ ލައްބައިކަ މީހުންގެ ހަޅުތާލުން 4 ބިލިއަން ރުޕީސްގެ ގެއްލުމާ ކުރިމަތިލާން ޖެހިފައި ވެއެވެ.
