އިންޑިއާއިން އިގްތިސާދީ ތަރައްގީ ހޯދުމަށް އުމުރާނީ ތަރައްގީގައި ކުރިން ދުވަހަކުވެސް އިންވެސްޓް ނުކުރާ މިންވަރަށް އިންވެސްޓް ކުރުމަށް މަސައްކަތް ފަށައިފިއެވެ. އިންޑިއާއިން ބުނާ ގޮތުން މި މަސައްކަތުގެ މަގްސަދަކީ ދުނޔޭގެ ފެންވަރުގެ އިންފްރާސްޓްރަކްޗަރ ޕްރޮޖެކްޓްތައް ގާއިމްކޮށް ރައްޔިތުންގެ ދިރިއުޅުގެ ފެންވަރު މަތިކުރާށެވެ.
ކުރިއަށް އޮތް ފަސް އަހަރު ތެރޭގައި ޕްރައިވެޓް ކުންފުނިތަކުން އެތައް ދާއިރާއަކުން އުމްރާނީ ތަރައްގީއަށް އިންވެސްޓް ކުރަން އިންޑިއާ ބޭނުން ވެއެވެ. އިންޑިއާއިން އުންމިދު ކުރަނީ ބޭރުގެ ކުންފުނިތަކުންވެސް އިންފްރާސްޓްރަކްޗާ ޕްރޮޖެކްޓްތަކުގައި ބައިވެރިވާން އަންނާނެ ކަމަށެވެ.
އިންޑިއާއިން އުމްރާނީ ތަރައްގީއަށް 1.5 ޓްރީލިއަން ޑޮލަރު އިންވެސްޓް ކުރާނެކަމަށް އިންޑިއާގެ ބޮޑު ވަޒީރު ނަރެންދްރަ މޮދީ ވަނީ އިޢުލާން ކުރައްވާފައެވެ.
އިންޑިއާއިން އަމާޒު ހިފާފައި ވަނީ 2025ގައި އިންޑިއާއަކީ، 5 ޓްރީލިއަން ޑޮލަރުގެ އިގްތިސާދަކަށް ވާށެވެ. އިންފްރާސްޓްރަކްޗާ ތަރައްގީއަކީ މިމަސައްކަތަށްވެސް މުހިންމު ކަމެކެވެ.
ޒަމާންތަކެއް ވަންދެން އިންޑިއާއިން އަމަލު ކުރަމުން އައީ 1960ގެ އަހަރުތަކުގައި އަމަލު ކުރަންމުން އައި ސޯޝަލިސްޓް އިގްތިސާދީ ސިޔާސަތުގެ މައްޗަށެވެ.
