ޕާކިސްތާންގައި 23 ނޫސްވެރިއަކު ވަނީ ގައުމުގެ ސައިބާ ގާނޫނުގެ ދަށުން ހައްޔަރުކޮށްފައެވެ.
ޕާކިސްތާންގެ މީޑިއާގެ މިނިވަންކަމަށް ރިޕޯޓްކުރާ ފްރީޑޮމް ނެޓްވަރކް، އިން ބުނާ ގޮތުގައި މިދިޔަ ދެ އަހަރުގެ ތެރޭގައި ސައިބާ ގާނޫނުގެ ދަށުން ނޫސްވެރިންނަށް ފިޔަވަޅު އެޅުން ވަނީ އިތުރު ވެފައެވެ.
ޕާކިސްތާންގެ ނޫސްވެރިންނާ ދެކޮޅަށް ތުހުމަތު ކުރެވޭ އަމަލު ތަކަކީ، "ސިފައިންނަށް ހުތުރުވާ ގޮތަށް ރިޕޯޓް ކުރުން" ނުވަތަ "ޝަރުއީ ދާއިރާގެ އަގު ވައްޓާލުން" ނުވަތަ ޖާސޫސީ އިދާރާތަކުގެ އަގު ވައްޓާލުން" މިފަދަ ކުށްތަކެވެ. އަދި ބައެއް ފަހަރަށް ނޫސްވެރިންނަށް ގައުމަށް ޚިޔާނާތްތެރިވުމުގެ ކުށުގައިވެސް ތުހުމަތު ކުރެވެއެވެ.
ޕާކިސްތާނަކީ ހަރަކާތްތެރި މީޑިއާއެއް އޮންނަ ގައުމެކެވެ. 24 ގަޑިއިރަށް ދުރަށް ފޮނުވާ ޓީވީ ސްޓޭޝަންތަކަކީވެސް މީހުން ހޭލުންތެރި ކުރުމާއި ސަރުކާރުން ކުރާ ކަންކަން ރިޕޯޓް ކުރުމުގައި ހަރަކާތްތެރިވާ ސްޓޭޝަންތަކެވެ.
ޕާކިސްތާންގައި އިމްރާން ޚާންގެ ވެރިކަމުގައި މީޑިއާގެ މިނިވަންކަން ވަނީ ގެއްލިފައެވެ. ދުނިޔޭގެ ނޫސްވެރިކަމުގެ ލިސްޓްގައި ޕާކިސްތާން 2021ގައި ގިންތިކޮށްފައި ވަނީ 180 ގައުމުގެ ތެރޭން 145ވަނާގައެވެ.
