ޗައިނާގެ ޒުވާނުންގެ 86.6 އިންސައްތަ މީހުން ދަރަނިވެރި ވެފައިވާ ކަމަށް ރިޕޯޓްތައް ބުނެއެވެ. މިއީ 1990ގައި އުފަންވެފައިވާ 175 މިލިއަނެއްހާ ޒުވާނުންނެވެ.
ޕީޕަލްސް ޑެއިލީ ރިޕޯޓް ކުރިގޮތުގައި ބޭންކް އޮފް ޗައިނާގެ ކޮންސިއުމާ ފައިނޭންސް އަދި އެބެންކުގެ ޑޭޓާ ޕްލެޓްފޯމް ޑޭޓާގޫ އިން ބުނާ ގޮތުން ޗައިނާގެ ޒުވާން އާބާދީގެ މީހުންގެ މެދުގައި ޚަރަދު ކުރާ ނިސްބަތް އޮތީ ކަންބޮޑުވާހައި ހިސާބުގައެވެ.
ޗައިނާގެ އުމުރުން 18 އަހަރާ 32 އަހަރާ ދެމެދުގެ އާބާދީގެ ހޭދަކުރުމުގެ އާދަތައް ދައްކާ ގޮތުން "މިހާރު ގަނެފައި ފަހުން ލާރިދައްކަން" ބުނާ ސްކީމްތައް މިމީހުންގެ މެދުގައި މަގުބޫލެވެ. އަދި މިމީހުންނަކީ އަގު މުދަލަށް ޝައުގުވެރިވާ އަދި އައު ކަންކަން ތަޖުރިބާ ކުރަން ބޭނުންވާ މީހުންނެވެ. މިމީހުން ޚަރަދު ކުރުމަށް ފަރުވާލެއް ނުބަހައްޓައެވެ.
ޕީޕަލްސް ޑެއިލީ ބުނާ ގޮތުން މިމީހުންނަކީ މަސައްކަތް ފަސޭހަކޮށްދޭ ވައްތަރުގެ ސާމާނު ގަތުމަށްވެސް އަވަހަށް ހޭދަ ކުރާ ބައެކެވެ. މިސާލަކަށް ބޫޓު ދޮންނަން ބޭނުންކުރާ މެޝިން ނުވަތަ ނާސްތާ ހަދައިދޭ މެޝިން ނުވަތަ ބިސް ކައްކާ މެޝިންފަދަ އާލާތްތަކަކީ މިމީހުންގެ މެދުގައި މަގުބޫލު ތަކެއްޗެވެ.
ސޭލްއަޅުވާފައި އޮންނަ ދުވަސްވަރު މިފަދަ ސާމާނުތަކަށް ސާޗްކުރާ ނިސްބަތް އިތުރުވެއެވެ. އެގޮތުން ތިން ލައްކަ ފަހަރަށް އީ ކޮމާސް ޕްލެޓްފޯމްތަކުގައި މިފަދަ ތަކެއްޗަށް ސާޗްކޮށްފައި ހުރެއެވެ. މިއީ ކުރީ އަހަރުގެ އެ މޫސުމަށްވުރެން 200 ގުނަ އިތުރު އަދަދެކެވެ.
މީގެ އިތުރުން ޕެޓް ޝޮޕްތަކާއި ރީތި ވުމުގެ ސާމާނު ވިއްކާ އަދި އެފަދަ ޚިދުމަތްދޭ ތަންތަނަށްވެސް މިމީހުން ހޭދަކުރާ ނިސްބަތް އިތުރުވެފައިވާ ކަމަށް ދައްކައެވެ.
