ނިމިދިޔަ އޮކްޓޫބަރު މަހު އާދަޔާ ޚިލާފަށް ގިނައިން ޗައިނާގެ އަސްކަރީ މަތިންދާ ބޯޓުތައް ޓައިވާންގެ ވައިގެ ސަރަހައްދަށް ވަދެފައިވާ ކަމަށް ޓައިވާނުން ބުނެފިއެވެ.
ޓައިވާނުގެ ދިފާއީ ވުޒާރާއިން ބުނާ ގޮތުން 196 އަސްކަރީ މަތިންދާ ބޯޓްގެ ދަތުރުތައް ޗައިނާއިން ޓައިވާން ސަރަހައްދަށް ބާއްވާފައި ވެއެވެ.
އޭގެ ކުރީ މަހު، ސެޕްޓެމްބަރު މަހު ޗައިނާއިން 119 ފަހަރަށް ޓައިވާންގެ ވައިގެ ސަރަހައްދަށް ވަދެފައި ވެއެވެ.
ޓައިވާންގެ ދިފާއީ ވަޒީރު ޗިއު ކުއޯ ޝެންގ ވިދާޅުވީ މިއީ 40 އަހަރުގެ ތެރޭގައި މިފަދަ ސީރިއަސް ކަމަކާ ކުރިމަތިލާން ޖެހުނު ފުރަތަމަ ފަހަރެވެ. އަދި އޭނާ ވަނީ ދިފާއީ ހޭދަ އިތުރު ކުރުމަށް އެދިވަޑައިގެންފައެވެ.
ޗައިނާއިން ބުނާ ގޮތުގައި ޗައިނާގެ މަތިންދާ ބޯޓުތައް އުދުހިފައި ވަނީ ޓައިވާނާ 100 އާ 150 މޭލު ބޭރުންނެވެ.
ޗައިނާއިން މަސައްކަތް ކުރަނީ ޓައިވާނަށް ބިރު ދައްކައިގެން ޓައިވާން މިނިވަންވިޔަ ނުދިނުމަށެވެ. އެމެރިކާއިން ވަނީ ބައިނަލްއަގްވާމީ މުޖުތަމައުގައި ޓައިވާން ބައިވެރި ކުރުމަށް ގޮވާލާފައެވެ. ނަމަވެސް ޗައިނާއިން ބުނެފައި ވަނީ ޓައިވާނަށް އޮތް ހަމައެކަނި ގޮތަކީ ޗައިނާއާއެކު އިއްތިޙާދު ވުމެވެ.
އެމެރިކާގެ މަސްއޫލުވެރިން ވިދާޅުވާ ގޮތުގައި ޗައިނާއިން ޓައިވާން ވަށައިލައިފާނެއެވެ. އަދި ހިސާރުވެސް ކޮށްފާނެއެވެ. އަދި ޗައިނާއިން މިފަދަ ކަމެއް ކައިރި މުސްތަގްބަލުގައި ކުރުމަކީ އެކަށީގެންވާ ކަމެކެވެ.
