އައްޑޫ އަށް އެކަށީގެންވާ ތަރައްގީ ގެނެވޭނީ އިންޓަނޭޝަނަލް އެއާޕޯޓް އިތުރަށް ތަރައްގީކޮށްގެން ކަމަށް މޯލްޑިވްސް ނެޝަނަލް ޕާޓީގެ ރައީސް ކާނަލް ރިޓަޔާޑް މުހައްމަދު ނާޒިމް މިއަދު ވިދާޅުވެއްޖެ އެވެ.
ނާޒިމް މިހެން ވިދާޅުވީ އައްޑޫ އާއި ފުވައްމުލަކަށް އެ ޕާޓީގެ ލީޑާޝިޕްގެ ބޭފުޅުން ކުރައްވަމުން ގެންދަވާ ދަތުރުގެ ތެރެއިން ފޭދޫގައި އެމްއެންޕީގެ އޮފީސް ހުޅުވުމަށްފަހު ވާހަކަދައްކަމުންނެވެ.
ނާޒިމް ވިދާޅުވީ އެ ޕާޓީން އެކުލަވާލާ މެނިފެސްޓޯގައި އައްޑޫއަކީ ވަރަށް ހާއްސަ ސިޓީއެއް ކަމަށެވެ. އެ ސިޓީގެ ތަރައްގީގެ މަސައްކަތްތަކަށް އިސްކަން ދީ ގިނަ ކަންތައްތަކެއް ހިމަނުއްވާނެ ކަމަށްވެސް ވިދާޅުވިއެވެ.
ނާޒިމް ވިދާޅުވީ 2023 ގެ އިންތިހާބަށް އެމްއެންޕީން ތައްޔާރުކުރާ މެނިފެސްޓޯގައި އައްޑޫގެ ތަރައްގީ އަށް ގިނަ ކަންތައްތަކެއް ހިމަނާނެ ކަމަށެވެ. އެގޮތުން އައްޑޫ އަށް އެކަށީގެންވާ ތަރައްގީ ގެނެވޭނީ އިންޓަނޭޝަނަލް އެއާޕޯޓް އިތުރަށް ތަރައްގީކޮށްގެން ކަމަށާއި އަދި އޭގެ ސަބަބުން ފަތުރުވެރިކަން ވެސް ވަރަށް ބޮޑަށް ކުރިއަރައިގެންދާނެ ކަމަށް ނާޒިމް ވިދާޅުވި އެވެ.
އެންމެ ދެކުނުގެ ދެ ސިޓީއަށް އެމްއެންޕީގެ އިސް ބޭފުޅުން ކުރައްވާ ދަތުރުގައި އިއްޔެ އާއި މިއަދު ވަޑައިގެންފައިވަނީ ފޭދޫ އާއި މަރަދޫ ފޭދޫއަށެވެ. އަދި މަރަދޫ އާއި ހިތަދޫއަށެވެ.
